حماس کا ٹرمپ امن منصوبے پر سخت اعتراض، اسرائیلی انخلا اور بین الاقوامی ضمانتوں کا مطالبہ

غزہ: فلسطین کی مزاحمتی تنظیم حماس نے امریکی صدر ڈونلڈ ٹرمپ کے پیش کردہ 20 نکاتی امن منصوبے پر سنگین تحفظات کا اظہار کرتے ہوئے اس میں بنیادی ترامیم کا مطالبہ کر دیا ہے۔

فلسطینی ذرائع کے مطابق حماس کا مؤقف ہے کہ کسی بھی پائیدار امن کے لیے اسرائیل کا مکمل فوجی انخلا ناگزیر ہے، جبکہ رہنماؤں کو قتل نہ کیے جانے کی بین الاقوامی سطح پر ضمانت بھی فراہم کی جائے۔ ذرائع نے بتایا کہ حماس کو باضابطہ جواب دینے کے لیے دو سے تین دن درکار ہیں۔

مزید یہ کہ حالیہ دنوں میں حماس کے وفود نے دوحا میں ترک، مصری اور قطری حکام سے اہم ملاقاتیں کی ہیں، جہاں غیر مسلح کیے جانے کی شق سب سے زیادہ متنازعہ قرار دی گئی۔

واضح رہے کہ امریکی صدر ٹرمپ کے منصوبے کے تحت حماس کو مکمل طور پر غیر مسلح کرنے اور انہیں مستقبل کی حکومت میں کسی قسم کا کردار نہ دینے کی تجویز دی گئی ہے، البتہ پرامن رہنے والوں کے لیے عام معافی کی پیشکش موجود ہے۔

اسرائیلی وزیرِ اعظم بنیامین نیتن یاہو نے بھی اس منصوبے پر تبصرہ کرتے ہوئے واضح کیا کہ اسرائیلی فوج غزہ کے بیشتر حصوں میں بدستور موجود رہے گی، جس پر خطے میں مزید تناؤ کے خدشات بڑھ گئے ہیں۔