لاہور(نمائندہ خصوصی) پاکستان تحریک انصاف کے مرکزی صدر و سابق وزیراعلی پنجاب چودھری پرویز الٰہی نے کہا ہے کہ شریف برادران لندن میں بیٹھ کر عدلیہ کے خلاف سازش تیار کر رہے ہیں،
نوازشریف کے لوگ عدلیہ کو نیچا دکھانے کی کوشش کر رہے ہیں، خواجہ آصف کے اندر ان کا یار نوازشریف بولتا ہے، پلاننگ کے تحت عدلیہ کے خلاف سازش کی جا رہی ہے،چھاپے کے دوران پولیس والے ہمارے مہمانوں کے موبائل لے گئے ہیں، دس اپلائیڈ فار موٹر سائیکلیں لے گئے ،ہمارے ملازمین پر دہشتگردی کے پرچے کاٹے گئے، گیٹ ہمارا ٹوٹا اور نگران وزیراعلی افسوس اُدھر کر آئے جدھر ایک شیشہ بھی نہیں ٹوٹا۔
میڈیا سے گفتگو کرتے ہوئے انہوں نے کہا کہ انہوں نے کہا کہ شہباز شریف کا لندن میں زیادہ وقت نواز شریف کے پاس گزرا ہے، انہوں نے اس ملک کا حلیہ کیا بنا دیا ہے، اللہ تعالی چیف جسٹس صاحب کو ہمت دے، اگر لوگ عدلیہ کے ساتھ ہوں گے تو ہی اس ملک میں زندہ رہیں گے، ہماری عدلیہ متحد ہے اور کھڑی ہے، کالا کوٹ ایک نیا انقلاب لے کر آئے گا اور وہ انقلاب ان گھس بیٹھیوں کو بہا کر لے جائے گا۔انہوں نے کہا کہ ہر ادارہ عدلیہ کے پیچھے چھپتا ہے، اگر ہماری عدلیہ نہ ہو تو کوئی ان کو ایک پیسہ نہ دے، آئی ایم ایف کے ذریعے ہونا کچھ بھی نہیں ہے، ملک کو بس عدلیہ نے سنبھال رکھا ہے، پی ڈی ایم نے گند پھیلا رکھا ہے، اس وقت ہمارے 20 لوگوں کو پکڑا ہوا ہے، مجھ پر 17 مقدمات ہیں، پی ڈی ایم کی حکومت نے سارے ملک کو جیل میں تبدیل کردیا ہے۔
پرویز الٰہی نے کہا کہ پی ڈی ایم نے پاکستان کے آئین کے ساتھ کھلواڑ کیا، شریف خاندان کی ساری زندگی انتقام کی سیاست ختم نہیں ہونی، ان کو کبھی عقل نہیں آنی، پی ٹی آئی پر بھی کیسز بن رہے ہیں اور ہم پر بھی، ہمارے خلاف زیادہ کیسز بن رہے ہیں، عمران خان پر 123 مقدمات درج ہو چکے ہیں، دو چار بندے کہتے ہیں ہم ہی آئین ہیں۔یہ کہتے ہیں ہم نے انتخابات نہیں کروانے، پیسے نہیں ہیں، سپریم کورٹ سے بڑا فیصلہ آئے گا، ہم نے کسی کو معاف نہیں کرنا، ہم ایسا ایک سسٹم لے کر آئیں گے جس سے ایک فیئر ٹرائل ہوگا، ان کو ایسی سزا ہوگی جس سے ملک میں دوبارہ کوئی ایسی حرکت نہیں کر سکے گا۔
انہوں نے کہاکہ بلاول بھٹو نے بھارت میں پاکستان کی کونسی نمائندگی کی ہے، بلاول بھٹو پاکستان کو نہیں ان کو ڈیفنڈ کررہے تھے جنہوں نے ان سے ہاتھ بھی نہیں ملایا، ہم حکومت میں ہوتے ہوئے اچھا سوچتے ہیں، اچھے فیصلے کرتے ہیں، اللہ کو پتا ہے کہ کون کیا کر رہا ہے۔انہوں نے مزید کہا کہ پولیس والے ہمارے مہمانوں کے موبائل لے گئے ہیں، دس اپلائیڈ فار موٹر سائیکلیں لے گئے ،ہمارے ملازمین پر دہشتگردی کے پرچے کاٹے گئے، گیٹ ہمارا ٹوٹا اور نگران وزیراعلی افسوس اُدھر کر آئے جدھر ایک شیشہ بھی نہیں ٹوٹا۔
