رانا ثنا: فیلڈ مارشل عاصم منیر کی مدت 2027ء میں مکمل ہوگی، ایکسٹینشن پر بات اس کے بعد ہوگی

لاہور: وزیراعظم کے مشیر رانا ثنا اللہ نے کہا ہے کہ فیلڈ مارشل سید عاصم منیر کی مدتِ ملازمت 2027ء میں مکمل ہوگی، اس کے بعد ہی ممکنہ ایکسٹینشن پر بات کی جاسکے گی۔

پنجاب اسمبلی میں میڈیا سے گفتگو کرتے ہوئے انہوں نے کہا کہ فیلڈ مارشل عاصم منیر نے 78 برس میں پہلی بار قوم کو ایک ایسا معرکہ حق دیا ہے جس پر پورا ملک فخر کر رہا ہے۔ ان کے مطابق قومی سلامتی اور ادارہ جاتی ہم آہنگی کے لیے یہ ایک سنگ میل ہے۔

رانا ثنا اللہ نے کہا کہ موسمیاتی تبدیلی کے باعث ستلج اور راوی میں خشک سالی کے بعد اب غیر معمولی پانی آیا ہے، تاہم حکومت نے مؤثر ٹیم ورک کے ذریعے جانی نقصان کو کم سے کم رکھا۔ تمام اداروں نے مل کر لاکھوں افراد کو بروقت محفوظ مقامات پر منتقل کیا، اگر حکومت الرٹ نہ ہوتی تو نقصان کئی گنا زیادہ ہوتا۔

انہوں نے زور دے کر کہا کہ ملک میں سول وار کی کوشش کی گئی، پہلے 9 مئی کو اور پھر 24 اور 26 مئی کو، مگر ایسی سازش کسی صورت کامیاب نہیں ہونے دی جائے گی۔ ریاست کی سالمیت کے خلاف کسی بھی دھڑے کی کوشش کو سختی سے روکا جائے گا۔

مزید گفتگو میں انہوں نے کہا کہ ماضی میں آرمی چیف کی مدتِ ملازمت چار سال اور پھر تین سال تھی، لیکن اب اسے پانچ سال کردیا گیا ہے۔ فیلڈ مارشل عاصم منیر کی موجودہ مدت 2027ء میں پوری ہوگی، اور اس وقت ہی توسیع سے متعلق کوئی سوال پیدا ہوسکتا ہے۔