لاہور (کامرس ڈیسک)فائونڈر گروپ کے سرگرم رکن وپاکستان سٹون ڈویلپمنٹ کمپنی کے بور ڈ آف ڈائریکٹرز کے رکن خادم حسین نے نیپرا کی جانب سے بجلی کی قیمتوں میں سہ ماہی ایڈجسٹمنٹ کی مد میں بجلی5.40روپے فی یونٹ اضافہ پر تشویش کا اظہار
کرتے ہوئے کہا ہے کہ بجلی کے فی یونٹ قیمتوں میں پہلے ہی ہوشرباا ضافہ ہوچکا ہے اس کے بعد ہرماہ ماہانہ فیول ایڈجسٹمنٹ کے ساتھ ساتھ سہ ماہی فیول ایڈجسٹمنٹ سے سے صنعتی شعبہ کے لیے بجلی کی قیمتوں میں ہوشربا اضافہ ہورہا ہے ،۔
انہوںنے کہا کہ بجلی کی قیمتوں میں مسلسل اضافہ صنعتی ترقی کیلئے نقصان دہ ہے۔ ان خیالات کااظہار انہوںنے فیروز پور بورڈ کے تاجروں کے وفد سے گفتگو کرتے ہوئے کیا۔انہوں نے کہا کہ بجلی کی قیمتوں میں اضافوں کے ساتھ ساتھ ماہانہ ، سہہ ماہی فیول ایڈجسٹمنٹ فارمولہ ظالمانہ فیصلہ ہے بجلی کی فی یونٹ قیمتوں میں پہلے ہی ہوشربا اضافہ ہوچکا ہے اس لیے بجلی کی قیمتوں میں مزید اضافہ ، فیول ایڈجسٹمنٹ فارمولہ یکسر ختم کیا جائے ۔اس سے صنعتی شعبہ متاثر ہورہا ہے اور ہوشربا بلوں کی عدم ادائیگی پر متعدد صنعتوں کے کنکشن کاٹ دیئے گئے ہیں۔ پاور پلانٹس کے ذریعے مہنگی بجلی کی پیداوار پر انحصار ختم کیا جائے اورمہنگے فرنس آئل کی بجائے تمام پاور پلانٹ گیس پر منتقل کیا جائے تاکہ بجلی کی پیداوار ی لاگت کم ہوسکے ۔
مہنگی بجلی کی پیداوار پر انحصار ختم، سستی اور متبادل ذرائع سے بجلی پیدا کرنے کی پلاننگ کی جائے ۔فائونڈر گروپ کے رہنما میاں محمد اشرف نے کہا کہ مہنگی بجلی و گیس سے صنعتی شعبہ کی پیداواری لاگت میں اضافہ سے اشیاء مہنگی ہورہی ہیں اور مہنگی اشیاء کے باعث بیرون ملک ملکی مصنوعات کی مانگ میں کمی کے باعث برآمدات کمی کا شکار ہونگے جس سے حکومتی برآمدی اہداف متاثر ہونگے برآمدات کم ہونے سے حکومتی زرمبادلہ ذخائر بھی کمی کا شکار ہونے سے حکومتی مشکلات میں اضافہ ہوگا ۔