دبئی(شوبز ڈیسک)ہالی ووڈ فلم باربی کو متحدہ عرب امارات کے سینمامیں دکھانے کی اجازت دے دی گئی۔
غیرملکی میڈیا کے مطابق فلم 10اگست سے سینما گھروں میں دکھائی جائے گی اور اس حوالے سے عوام نے ٹکٹ کی خریداری بھی شروع کردی ہے۔رپورٹس کے مطابق فلم کی ریلیز کی نئی تاریخ متحدہ عرب امارات کی میڈیا کونسل کی منظوری کے بعد سامنے آئی ہے۔
غیرملکی میڈیا کے مطابق متحدہ عرب امارات کی میڈیا کونسل نے میڈیا مواد کے معیارات اور ملک میں عمر کی حد بندی کے مطابق ضروری طریقہ کار مکمل کرنے کے بعد باربی فلم کو متحدہ عرب امارات کے لائسنس یافتہ سینما گھروں میں نمائش کی منظوری دی ہے۔غیرملکی میڈیا کے مطابق فلم کی ریلیز نامعلوم وجوہات کی بنا پر روک دی گئی تھی اور اس سے قبل اس کی ریلیز کی تاریخ 31اگست سامنے آئی تھی۔
رپورٹس کے مطابق ہالی ووڈ فلم اب تک دنیا بھر میں 800ملین ڈالر سے زائد کا بزنس کر چکی ہے۔ہالی ووڈ میں باربی پر بنائی گئی اس فلم میں خوبرو اداکارہ مارگٹ روبی باربی کا کردار ادا کریں گی۔اس فلم کی ہدایتکار گریٹا گروگ ہیں جبکہ دیگر اداکاروں میں رائن گوسلنگ، امیرکا فریرا اور دعا لیپا شامل ہیں۔
