چاہت فتح علی خان کا دعویٰ: انڈے ایونٹ انتظامیہ نے ہی مروائے

سوشل میڈیا پر اپنی بے سُری گائیکی کے باعث مشہور ہونے والے چاہت فتح علی خان نے انڈے مارنے کے واقعے پر بڑا انکشاف کرتے ہوئے کہا ہے کہ یہ سب ایونٹ انتظامیہ کی منصوبہ بندی کا نتیجہ تھا۔

چاہت فتح علی خان کے مطابق انہیں ایک کیفے کی افتتاحی تقریب میں پرفارمنس کے لیے مدعو کیا گیا۔ تقریب کے دوران انتظامیہ نے انہیں ملازمین کے ساتھ کیفے کے باہر تصاویر کھنچوانے کے لیے بھیجا، جہاں اچانک دو افراد نے ان پر انڈے پھینک دیے اور فرار ہوگئے۔ یہ منظر کیفے کے اپنے سیکیورٹی گارڈ نے ریکارڈ کیا اور بعد ازاں کیفے کی جانب سے ہی سوشل میڈیا پر وائرل کردیا گیا، جسے بعد میں ڈیلیٹ کر دیا گیا۔

چاہت فتح علی خان کا کہنا ہے کہ جب انہوں نے کیفے انتظامیہ سے ویڈیو فراہم کرنے کا مطالبہ کیا تو انہیں انکار کر دیا گیا، حالانکہ ثبوت صاف بتاتے ہیں کہ انتظامیہ خود اس واقعے میں ملوث تھی۔ ان کا دعویٰ ہے کہ مزید شواہد بھی ان کے پاس موجود ہیں جو وہ پولیس کے حوالے کرکے انتظامیہ کے خلاف قانونی کارروائی کریں گے۔