پیرافورس کا خوف،بورڈاتارتے کرنٹ سے دکانداروں سمیت4افراد جاں بحق

لاہور کے علاقے شاہدرہ میں پیرافورس کے دباؤ اور ایف آئی آر کے خوف سے دکانداروں نے بغیر کسی پیشہ ور مدد کے اپنی دکان کی چھت سے آئرن بورڈ اتارنے کی کوشش کی۔ اس دوران بورڈ بجلی کے تاروں سے چھو گیا، جس سے کرنٹ پھیل گیا اور چار افراد جان کی بازی ہار گئے۔
ریسکیو 1122 کے مطابق، دولت خان روڈ پر بورڈ اتارتے ہوئے ایک شخص کا ہاتھ قریب سے گزرنے والے بجلی کے تاروں سے لگ گیا، جس سے آئرن بورڈ میں کرنٹ دوڑ گیا۔ مرنے والوں میں دو دکاندار، ایک رکشہ ڈرائیور، اور ایک ملازم شامل ہے۔
عینی شاہدین کا کہنا ہے کہ پیرافورس کی جانب سے بورڈ اتارنے کا حکم دیا گیا تھا، لیکن کاریگر دستیاب نہ ہونے اور قانونی کارروائی کے خوف سے دکانداروں نے یہ کام خود انجام دیا، جو جان لیوا ثابت ہوا۔