لاہور: پاکستان کرکٹ بورڈ (پی سی بی) نے ایک بار پھر قومی ٹیم کے کوچنگ اسٹاف میں بڑی تبدیلیوں کا فیصلہ کر لیا ہے، اور بیٹنگ، بالنگ، فیلڈنگ اور اسٹرینتھ کوچز کے لیے نئی بھرتیوں کا باضابطہ اعلان کر دیا گیا ہے!
پی سی بی کی ویب سائٹ پر جاری کردہ اشتہار میں دلچسپی رکھنے والے امیدواروں کو دعوت دی گئی ہے کہ وہ 6 جون شام 5 بجے تک اپنی درخواستیں جمع کروائیں۔
نئی بھرتیوں میں بیٹنگ کوچ کے لیے کم از کم لیول ٹو کوچنگ کورس اور پانچ سالہ تجربہ لازمی قرار دیا گیا ہے۔ بالنگ کوچ کے لیے بھی یہی شرائط رکھی گئی ہیں۔
فیلڈنگ کوچ کے لیے امیدوار کے پاس لیول ٹو سرٹیفکیٹ اور پانچ سالہ تجربہ ہونا ضروری ہے، جبکہ اسٹرینتھ اینڈ کنڈیشننگ کوچ کے لیے اسپورٹس سائنسز یا فزیکل ایجوکیشن میں بیچلر ڈگری اور 10 سال کا میدان کا تجربہ مانگا گیا ہے۔
یہ فیصلہ اُس وقت سامنے آیا ہے جب بورڈ نے حال ہی میں نیوزی لینڈ کے سابق کوچ مائیک ہیسن کو قومی ٹیم کا ہیڈ کوچ تعینات کیا۔ اس تقرری کے بعد اب پی سی بی چاہتا ہے کہ باقی کوچنگ اسٹاف بھی نئے وژن کے مطابق چُنا جائے۔
کرکٹ پنڈتوں کا ماننا ہے کہ پی سی بی کی نظر اب ایسے باصلاحیت سابق کھلاڑیوں پر ہے جو جدید کرکٹ کی نبض پہچانتے ہوں۔ کیا کوئی نیا چہرہ سامنے آئے گا؟ یا پھر پرانے سورما دوبارہ میدان سنبھالیں گے؟ یہ جاننے کے لیے آپ کو اپڈیٹ رہنا ہو گا!
