پنجاب میں چار ماہ میں 480 ملزمان ہلاک، سی سی ڈی کا ریکارڈ آپریشنز کے بعد بڑے بجٹ کا مطالبہ

کاؤنٹر کرائم ڈیپارٹمنٹ (CCD) نے صوبہ پنجاب میں گزشتہ چار ماہ کے دوران ریکارڈ توڑ پولیس آپریشنز انجام دیے، جن میں 815 پولیس مقابلے ہوئے۔ ان کارروائیوں کے دوران 480 خطرناک ملزمان کو ہلاک جبکہ 335 کو زخمی حالت میں گرفتار کیا گیا۔ حکام کا کہنا ہے کہ ان اقدامات سے صوبے میں جرائم کی شرح میں نمایاں کمی اور امن و امان کی صورتحال میں بہتری آئی ہے۔
ان نتائج کے بعد، سی سی ڈی نے حکومت پنجاب سے آئندہ مالی سال کے لیے بڑے بجٹ کی منظوری کا مطالبہ کیا ہے، جس میں 38 نئے پولیس اسٹیشنز، 100 ڈرونز، 10 جدید جرمن لوکیٹرز، افسران کے لیے رہائشی مکانات، اور 2 ہزار قدآور اہلکاروں کی بھرتی شامل ہیں۔ اس کے علاوہ 10 ہزار اضافی نفری، 290 کنال اراضی، اور جدید آئی ٹی و ڈیٹا سینٹرز کے قیام کی بھی سفارش کی گئی ہے تاکہ جرائم کی ٹریکنگ اور تجزیاتی صلاحیتوں میں مزید اضافہ ہو سکے۔
ذرائع کے مطابق، آئی جی پنجاب نے یہ سمری حکومت کو ارسال کر دی ہے اور آئندہ بجٹ اجلاس میں اس پر حتمی فیصلہ متوقع ہے۔