اسلام آباد: پاک فوج کے ترجمان لیفٹیننٹ جنرل احمد شریف چوہدری نے الجزیرہ ٹی وی کو انٹرویو دیتے ہوئے کہا ہے کہ بھارت نے دہشتگردی کو پاکستان کے خلاف اپنی ریاستی پالیسی کا حصہ بنا رکھا ہے۔ ان کے بقول بھارت کی سرپرستی میں ہونے والی دہشتگردانہ کارروائیاں خصوصاً بلوچستان کو غیر مستحکم کرنے کے لیے کی جا رہی ہیں۔
ڈی جی آئی ایس پی آر نے کہا کہ بھارت کی خفیہ ایجنسیاں اور اسٹیبلشمنٹ پاکستان میں تخریب کاری کی مالی و عملی معاونت کر رہی ہیں، اور فتنتہ الہندوستان نامی گروہ اس ایجنڈے پر کام کر رہا ہے۔ ان کا کہنا تھا کہ فتنتہ الخوارج جیسے گروہ دراصل وہ گمراہ عناصر ہیں جو اسلام کے نام پر اپنی مرضی کا جہاد مسلط کرتے ہیں، حالانکہ قتال یا جہاد کا اختیار صرف ریاست کو حاصل ہے۔
انہوں نے کہا کہ شمالی وزیرستان میں حالیہ دہشتگرد حملہ، جس میں 16 فوجی شہید ہوئے، ایک واضح مثال ہے کہ دشمن قوتیں پاکستان میں افراتفری پھیلانے پر تُلی ہوئی ہیں۔ پاکستان سمجھتا ہے کہ اس حملے میں بھارت براہ راست ملوث ہے، اور اس قسم کی کارروائیاں علاقائی امن کے لیے خطرہ ہیں۔
لیفٹیننٹ جنرل احمد شریف نے بھارت کے قومی سلامتی کے مشیر اجیت دوول کو ان نیٹ ورکس کا ماسٹر مائنڈ قرار دیا، اور کہا کہ امریکا، کینیڈا اور دیگر عالمی طاقتیں بھی بھارت کی ریاستی دہشتگردی کا اعتراف کر چکی ہیں۔
انہوں نے اسرائیل کی طرف سے ایران پر حملوں کی مذمت کرتے ہوئے کہا کہ پاکستان ایران کی سیاسی و سفارتی حمایت جاری رکھے گا۔
اپنے انٹرویو میں انہوں نے یہ بھی واضح کیا کہ پاکستان کا ایٹمی پروگرام مکمل طور پر محفوظ، ذمہ دارانہ اور ناقابل تسخیر ہے، اور کوئی بھی ملک اس پر میلی آنکھ ڈالنے کی جرات نہیں کر سکتا۔ پاکستان کی جوہری صلاحیت خطے میں توازن کا اہم ستون ہے۔
