پاک بھارت کشیدہ تعلقات کے باوجود بالی ووڈ کے سپر اسٹار شاہ رخ خان نے ایک مثبت قدم اٹھاتے ہوئے اپنی سی پی ایل فرنچائز ٹرنباگو نائٹ رائیڈرز (ٹی کے آر) میں دو پاکستانی کھلاڑیوں کو شامل کر لیا ہے، جسے کھیلوں میں سرحدوں سے بالاتر جذبے کی علامت قرار دیا جا رہا ہے۔
میڈیا ذرائع کے مطابق شاہ رخ خان نے سی پی ایل 2025 کے سیزن کے لیے سابق پاکستانی فاسٹ بولر محمد عامر اور نوجوان اسپنر محمد عثمان طارق سے معاہدہ کیا ہے۔ اس فیصلے کو شائقین کرکٹ کی جانب سے سراہا جا رہا ہے۔
محمد عامر کا شمار سی پی ایل کے تجربہ کار کھلاڑیوں میں ہوتا ہے۔ وہ لیگ کے چار سیزن میں حصہ لے چکے ہیں، جہاں انہوں نے 39 میچز میں 18.09 کی شاندار اوسط سے 51 وکٹیں حاصل کیں۔ اس بار بھی ان سے بڑی کارکردگی کی امید کی جا رہی ہے۔
محمد عثمان طارق، جنہوں نے پی ایس ایل میں کوئٹہ گلیڈی ایٹرز کی نمائندگی کی، پہلی بار ویسٹ انڈیز کی سرزمین پر کھیلیں گے۔ حالیہ سیزن میں انہوں نے صرف پانچ میچز میں 10 وکٹیں حاصل کر کے اپنی مہارت کا لوہا منوایا تھا۔
یہ امر قابل ذکر ہے کہ شاہ رخ خان نہ صرف فلم انڈسٹری میں ایک بڑا نام ہیں بلکہ کھیلوں میں بھی ان کی گہری دلچسپی ہے۔ وہ کئی عالمی کرکٹ فرنچائزز کے مالک ہیں اور کھیل کے ذریعے دوستی و امن کو فروغ دینے کے خواہشمند سمجھے جاتے ہیں۔
ٹرنباگو نائٹ رائیڈرز سی پی ایل کی نمایاں اور کامیاب ٹیموں میں شمار ہوتی ہے، جس نے اب تک چار بار ٹائٹل اپنے نام کیا ہے۔ پاکستانی کھلاڑیوں کی شمولیت ٹیم کی مضبوطی میں مزید اضافہ کرے گی۔
