نئی دہلی: سابق بھارتی کپتان روہت شرما نے ٹی20 ورلڈ کپ 2024 میں پاکستان کے خلاف میچ کے حوالے سے گفتگو کرتے ہوئے کہا ہے کہ محمد رضوان کی وکٹ ہی میچ کا فیصلہ کن لمحہ ثابت ہوئی۔
روہت شرما نے کہا کہ نیویارک میں ہونے والے اس اہم مقابلے میں رضوان کی وکٹ حاصل کرنا بھارتی ٹیم کے لیے بہت بڑی کامیابی تھی، کیونکہ اُس وقت رضوان وکٹ پر سیٹ ہو چکے تھے اور ایک خطرناک اننگز کھیلنے کی پوزیشن میں تھے۔
انہوں نے مزید کہا کہ محمد رضوان ایک شاندار بلے باز ہیں جنہوں نے پاکستان کو کئی بار میچز جتوائے ہیں، اور ان کی وکٹ نے میچ کا رخ بھارت کے حق میں موڑ دیا۔
یاد رہے کہ اس میچ میں 15ویں اوور کی پہلی گیند پر جسپریت بمراہ نے رضوان کو 31 رنز پر آؤٹ کیا تھا، جب پاکستان کا مجموعی اسکور 80 رنز تھا۔
پاکستان نے بھارت کے 120 رنز کے ہدف کے تعاقب میں 7 وکٹوں کے نقصان پر 113 رنز بنائے تھے، اور بھارت نے یہ سنسنی خیز مقابلہ 6 رنز سے جیت لیا تھا۔
