کرکٹ کے میدان میں ہر لمحہ کسی فلمی سین سے کم نہیں ہوتا، خاص طور پر جب اس کا تعلق ویرات کوہلی اور انوشکا شرما جیسے سلیبریٹیز سے ہو۔ رائل چیلنجرز بنگلور (RCB) اور سن رائزرز حیدرآباد (SRH) کے میچ میں اس وقت سنسنی پھیل گئی جب کوہلی کے ہیلمٹ پر تیز گیند جا لگی۔
خوش قسمتی سے کوہلی فوری طور پر سنبھل گئے اور میچ کھیلتے رہے، لیکن اس لمحے نے ان کی اہلیہ انوشکا شرما کو خاصا پریشان کر دیا۔ اسٹیڈیم میں بیٹھیں انوشکا کی فکرمند آنکھوں نے سارا منظر بیان کر دیا—ایک ویڈیو میں دیکھا جا سکتا ہے کہ وہ گھبراہٹ کے عالم میں اپنے چہرے کو ہاتھوں سے چھپا رہی ہیں۔
یہ منظر دیکھتے ہی دیکھتے سوشل میڈیا پر وائرل ہو گیا۔ شائقین نے انوشکا کے خالص انسانی ردعمل کو سراہا۔ ایک صارف نے لکھا: "جب ویرات کو گیند لگی، انوشکا کی آنکھوں میں خوف تھا، محبت کی حقیقی تصویر۔”
واضح رہے کہ انوشکا شرما اکثر ویرات کوہلی کے میچز میں موجود ہوتی ہیں اور ان کا حوصلہ بڑھاتی ہیں۔ اس جوڑی نے حال ہی میں ویرات کی ٹیسٹ کرکٹ سے ریٹائرمنٹ کے بعد ورنداون میں پرمانند مہاراج کے آشرم کا دورہ بھی کیا۔
ویرات نے اپنے ریٹائرمنٹ نوٹ میں کہا:
"سفید لباس پہننا ایک روحانی تجربہ ہے۔ یہ سفر مشکل ضرور تھا، مگر میں مطمئن ہوں کہ میں نے اپنا سب کچھ دیا، اور بدلے میں اس کھیل نے مجھے زندگی کی سب سے بڑی نعمتیں واپس لوٹائیں۔”
