اسلام آ باد (نمائندہ خصوصی) وفاقی وزیر اطلاعات و نشریات مریم اورنگزیب نے کرنٹ اکاونٹ اور تجارتی خسارے میں غیر معمولی کمی کا دعوی کردیا،
کہتی ہیں کہ کرنٹ اکاونٹ خسارے میں 76 فیصد اور تجارتی خسارے میں 40.4 فیصد کمی معاشی اقدامات کی درستگی ظاہر کرتی ہے۔ جمعہ کو وفاقی وزیر اطلاعات نشریات مریم اورنگزیب نے اپنے ایک بیان میں کہا ہے کہ 5 ای فریم ورک پاکستان میں معاشی ترقی کا گیم چینجر ثابت ہوگا، ایکسپورٹس، ای پاکستان، انوائرمنٹ، انرجی اور ایکویٹی ٹرن ارانڈ پاکستان کے ستون ہیں، اس فریم ورک کے ذریعے برآمدات میں اضافے کیلئے نئے کاروبار اور روزگار کی حوصلہ افزائی ہوگی۔
ان کا کہنا ہے کہ تعلیم، صحت کے فروغ اور آبادی پر کنٹرول سے پاکستان کی ترقی کی راہ ہموار ہوگی، سستی اور بلا تعطل توانائی کی فراہمی سے معیشت و کاروبار میں نئی تیزی آئے گی، آبی ذخائر اور غذائی تحفظ کے ذریعے ماحول کو بہتر بنایا جائے گا، ای پاکستان کے ذریعے نوجوانوں کیلئے ترقی کے نئے مواقع اور انہیں با اختیار بنائیں گے۔
مریم اورنگزیب نے کہا کہ جی ڈی پی کے لحاظ سے فسکل خسارے کا 4.9 فیصد سے کم ہوکر 4.6 فیصد پر آنا بڑی کامیابی ہے، یہ حکومت کی درست معاشی پالیسی کا مثبت نتیجہ ہے، کرنٹ اکاونٹ خسارے میں 76 فیصد اور تجارتی خسارے میں 40.4 فیصد کمی درست معاشی پالیسی کی علامت ہے۔
