کراچی میں ایف آئی اے نے منی لانڈرنگ کے مقدمے میں گرفتار ارمغان عرف "آرمی” کے خلاف اہم انکشافات پر مبنی رپورٹ انسداد دہشتگردی کی عدالت میں جمع کرا دی۔ رپورٹ کے مطابق ملزم نے ملازمین کے نام پر کھولے گئے سات جعلی بینک اکاؤنٹس کے ذریعے 21 کروڑ روپے کی لین دین کی۔
تفتیش میں انکشاف ہوا کہ ارمغان دو آف لائن بٹ کوائن والٹس (Exodus اور Electrum) استعمال کر رہا تھا، جن میں ہزاروں ڈالر مالیت کے کرپٹو اثاثے موجود ہو سکتے ہیں۔ تاہم، ان والٹس کے پاسورڈ اور پرائیویٹ کیز تک ابھی رسائی نہیں ہو سکی۔
ایف آئی اے کے مطابق ملزم نے 2023 سے 2025 تک لگژری گاڑیاں خریدنے پر 15 کروڑ روپے سے زائد خرچ کیے، جبکہ دو گاڑیاں (11 کروڑ روپے مالیت کی) برآمد کی جا چکی ہیں۔ عدالت نے ملزم کا 9 دن کا مزید جسمانی ریمانڈ منظور کرتے ہوئے آئندہ سماعت پر پیش رفت رپورٹ طلب کر لی۔
مزید تفتیش میں معلوم ہوا ہے کہ ارمغان بین الاقوامی جعلساز گروہ سے تعلق رکھتا ہے اور اس نے اپنے والد کے ساتھ مل کر ایک آئی ٹی کمپنی بنائی جس کی ماہانہ آمدنی 3 سے 4 لاکھ امریکی ڈالر تھی۔
