اسلام آباد(نیوز رپورٹر )وفاقی وزیر برائے انفارمیشن ٹیکنالوجی اور ٹیلی کمیونیکیشن شزہ فاطمہ خواجہ نے اعلان کیا ہے کہ مصنوعی ذہانت میں پاکستان نے اپنا پہلا قدم رکھتے ہوئے پہلی بار چیٹ جی پی ٹی بنا لیا ہے۔
اس حوالے سے اپنے ایک بیان میں انہوں نے کہا کہ مصنوعی ذہانت آگے بڑھنے سے ہمیں بہت سے شعبوں میں فائدہ ہوگا، اسی لیے مصنوعی ذہانت میں پہلی بار پاکستان کا چیٹ جی پی ٹی بنالیا ہے کیوں کہ دنیا کا مقابلہ کرنے کے لیے جدید علوم کی مہارت ضروری ہے، طلبا کے لیے مصنوعی ذہانت کا استعمال ان کی صلاحیتیں نکھارتا ہے۔
شزہ فاطمہ خواجہ کا کہنا ہے کہ انٹرنیٹ کی سپیڈ اس طرح نہیں جس طرح ہونی چاہیئے، دنیا تیزی سے ڈیجیٹائزیشن کی طرف جا رہی ہے، حکومت بھی ڈیجیٹائزیشن پر قانون سازی کے لیے کام کر رہی ہے، چیلنجز کے باوجود ملک میں ڈیجیٹلائزیشن کو فروغ دیا جارہا ہے، معیشت اب بہتر ہو رہی ہے تو امید کرتے ہیں باقی چیزیں بھی بہتر ہوں گی۔
