لاہور ( نمائندہ خصوصی) مسلم لیگ (ن) کے سینئر رہنما سینیٹر پرویز رشید نے واضح کیا ہے کہ مریم نواز اپنی سیاسی جماعت کا مقدمہ لڑنا بھی جانتی ہیں اور مخالفین کے مقدمے کے پوسٹ مارٹم بھی کرتی ہیں،ان کی تعیناتی پر پارٹی میں کوئی اختلاف نہیں ہے ،ماضی میں مریم نواز کی سٹریٹجی سے فائدہ ہوا اور پارٹی مشکل سے نکلی ،اب الیکشن مہم کی قیادت نواز شریف اور رہنمائی مریم نواز کو حاصل ہو گی۔
انہوں نے ایک انٹرویو کے دوران کہاکہ مریم نواز کی مسلم لیگ (ن) میں ایک طویل جدوجہد رہی ہے۔ جب پارٹی مشکل دور سے گزر رہی تھی اور ہمارے رہنمائوں گرفتار کیا گیا، مریم نے اس وقت پارٹی کو قیادت فراہم کی اور بڑے عوامی اجتماعات کیے۔ انہیں گرفتار بھی کیا گیا، انہوں نے جیل بھی کاٹی مگر اپنے موقف پر قائم رہیں۔
آج پارٹی کو ملنے والی کامیابیوں کے پیچھے اصل حکمت عملی مریم نواز کی ہی ہے۔ماضی میں اسٹیبشلمنٹ کے سیاست میں مبینہ کردار پر سخت اور کھل کر تنقید کے حوالے سے سوال پر پرویز رشید نے کہا کہ وہ شخصیات کی بجائے اس عمل کی مخالفت کرتی تھیں جس میں ادارے اپنے آئینی دائرے سے باہر نکل کر کام کر رہے تھے۔ مریم نواز نے تو اپنے بیانیے کو تسلیم کروایا ہے۔
یہی وجہ ہے کہ آج ہمارا مقابلہ اپنے سیاسی مخالفین اور سیاسی قوتوں سے ہے، نہ کہ اداروں کے آئینی حدود میں رہ کر کام کرنے سے۔ مریم اب انہی سیاسی مخالفین سے مقابلہ کریں گی۔تاہم سینیٹر پرویز رشید ایسے بیانیے سے انکار کرتے ہوئے کہتے ہیں کہ شہباز شریف کو بھی مریم پر اعتماد ہے اور یہی وجہ ہے کہ انہوں نے یہ نوٹیفکیشن کیا ہے، پارٹی میں ان کی تعیناتی پر کوئی اختلافات نہیں ہیں۔ انہوں نے کہا کہ پارٹی میں مریم نواز کو پسند اس لیے کیا جاتا ہے کہ وہ میرٹ پر فیصلے کرتی ہیں اور ہماری روایت بھی ہے کہ ہم مشکل وقت میں ساتھ رہنے والوں کو عہدوں پر فوقیت دیتے ہیں۔
مسلم لیگ (ن) کے رہنما پرویز رشید نے کہا کہ مریم نواز نے ماضی میں ثابت کیا کہ ان کی سٹریٹجی سے پارٹی کو فائدہ ہوا ہے اور وہ مشکل سے نکلی ہے اور اب ایک نئے انداز میں انتخابات میں جا رہے ہیں، وہ جو منصوبہ بنایا جا رہا تھا کہ 2023ء کے انتخابات کو ہائی جیک کیا جائے گا، وہ ناکام ہوا ہے، اس کے کردار بے نقاب ہوئے ہیں اور یہ سب مریم نواز نے ہی کیا ہے۔تاہم سینیٹر پرویز رشید کے مطابق نواز شریف کی وطن واپسی اور الیکشن مہم اب مکمل طور پر مریم کے سر ہو گی، پرویز رشید کے مطابق یہ نواز شریف کی واپسی کی جانب پہلا قدم ہے۔ نواز شریف کی قیادت اور رہنمائی مریم نواز کو حاصل ہو گی۔
