لاہور(کامرس رپورٹر) لاہور الیکٹرک سپلائی کمپنی (لیسکو) نے اپنے صارفین کیلئے خراب میٹرز کو تبدیل کرنے کا عمل شروع کر دیا ہے۔ 17 فروری تک تمام ڈیفیکٹو کوڈ والے سنگل فیز میٹرز کو تبدیل کیا جائے گا۔
واضح رہے کہ لیسکو میں تقریبا 1 لاکھ 58 ہزار سنگل فیز میٹرز کو ڈیفیکٹو کوڈ لگایا گیا تھا۔ میٹرز کی کمی کی وجہ سے آٹھ ماہ تک ان میٹرز پر ڈیفیکٹو کوڈ لگایا گیا، جس کے باعث صارفین کو اوسط بلز بھجوائے جاتے رہے، جس سے ان کے بلز میں غیر ضروری اضافہ ہو گیا۔لیسکو کے مطابق اب میٹرز کی تبدیلی کے عمل کے آغاز سے صارفین کو زیادہ درست بلز ملیں گے، اور اوسط بلز کی مشکلات کا خاتمہ ہو گا،اس اقدام سے صارفین کو بھاری بھرکم بلز کی وجہ سے جو مشکلات درپیش تھیں، ان میں کمی واقع ہو گی۔
خیال رہے کہ یہ فیصلہ لیسکو کی جانب سے صارفین کو سہولت دینے کیلئے کیا گیا ہے، تاکہ انہیں شفاف اور درست بلنگ کا تجربہ حاصل ہو سکے۔کمپنی نے صارفین سے درخواست کی ہے کہ وہ اپنے خراب میٹرز کی تبدیلی کے عمل کے حوالے سے متعلقہ دفاتر سے رابطہ کریں اور اپنی شکایات کا ازالہ کریں۔
