لاہور(نمائندہ خصوصی)پاکستان مسلم لیگ(ن) پنجاب کے نائب صدر رانا مشہود احمد نے کہا ہے کہ جب نواز شریف اقتدار میں آئے تو انہوں نے یہ نہیںکہا تھا کہ سابق حکمران کھا گئے بلکہ انہوںنے اپنے عزم سے معیشت کو مضبوط کیا ،
ملک کو جتنے بھی بڑے منصوبے ملے وہ مسلم لیگ(ن) کے ادوار میں ملے ہیں ،قائد اعظم نے دو قومی نظریہ کے تحت پاکستان کے قیام کے لئے جدوجہد کی تا کہ مسلمان آزاد زندگی گزار سکیں،سیاستدانوں کے خلاف سازشیں کی گئیں،عوام کے منتخب نمائندوں کو خود فیصلے کرنے کی اجازت ہونی چاہیے ۔
بانی پاکستان ، نواز شریف کی سالگرہ اور کرسمس کے سلسلہ میں منعقدہ تقریب کے موقع پر میڈیا سے گفتگو کرتے ہوئے رانا مشہود نے کہاکہ جمہوریت کی بحالی عوام کے فیصلوں کی تائید ہے، مسلم لیگ (ن) نے عدلیہ کی بحالی کیلئے لانگ مارچ کیا ،نواز شریف نے کہا تھا ہم اقتدار کی جنگ نہیں بلکہ اقدار اور عوامی مفاد کی جنگ لڑ رہے ہیں،عوام جس کو منتخب کریں انہیں ہی فیصلے کرنے کا اختیار دینا ہوگا۔انہوںنے کہاکہ مسلم لیگ (ن) نے ملک سے دہشتگردی کو ختم کیا،عوام کو لوڈشیڈنگ کے عذاب سے نجات دلائی ،نواز شریف جب آئے تو انہوں نے یہ نہیں کہا کہ سابق حکمران کھا گئے،بلکہ نواز شریف نے اپنی معاشی ٹیم کو بٹھا کر ملکی معیشت کو مضبوط کرنے کے فیصلے کئے اور اپنے عزم سے معیشت کو مضبوط کر کے دکھایا ،مسلم لیگ (ن)کے ادوار میں ملک کو بڑے بڑے منصوبے ملے ۔
انہوںنے کہاکہ جب سابقہ دور میں مسلم لیگ(ن) کی حکومت آئی تو بیرون ممالک سے سرمایہ کاری کا شروع ہو گئی تھی لیکن دوسری طرف دھرنے،احتجاج،سول نافرمانی کی تحریک شروع ہو گئی ،2013 کے انتخابات کے دوسرے دن ہی عمران خان کی جانب سے نئے انتخابات مطالبہ کیا گیا۔ انہوںنے کہاک ہ عمران خان کی حکومت میں سب سے زیادہ قرضہ لیا گیا لیکن ایک اینٹ نہیں لگائی گئی،عمران خان نے جھوٹ بولنے کے سوا ملک کیلئے کچھ نہیں کیا،عمران خان نے نوجوانوں کو گمراہ کیا ہے۔2018 میں انتخابات چوری کرکے عمران خان کو اقتدار دیا گیا ،
جب سینیٹ میں ہاس ٹریڈنگ ہو رہی تھا وہ ٹھیک تھا،عمران خان نے خود کہا جنرل قمر جاوید باجوہ سے اچھا آرمی چیف کوئی نہیں دیکھا ، پھر جو زبان استعمال کی گئی وہ بھی سب کے سامنے ہے۔عمران خان چاہتے ہیں کہ اس کے مرضی کے کام ہوں،ملک میں معاشی اور دیگر مسائل کا ذمہ دار عمران خان ہے۔گندے کردار کے مالک عمران خان کو ملک پر مسلط کیا گیا۔نواز شریف کو بیٹے سے تنخواہ نہ لینے پر نکال دیا گیا لیکن عمران خان کابنی گالہ گھر غیر قانونی نکلا کوئی بات؟، توشہ خانہ لوٹ لیا ، جس طرح پارٹی کے لئے فنڈنگ حاصل کی وہ سب کے سامنے ہے ۔ انہوںنے کہا کہ گورنر نے وزیراعلیٰ کو قانون کے مطابق ڈی نوٹیفائی کیا ،عدالت نے پھر بحال کر دیا ہے ،ہمارے تحفظات ہیں عدالتوں کو اب فیصلہ کرنا چاہیے۔
