اسلام آباد ہائیکورٹ میں ایک اہم کیس کی سماعت کے دوران سنجیدہ ماحول اُس وقت خوشگوار بن گیا جب جسٹس سردار اعجاز اسحاق خان اور پاکستان بار کونسل کے نمائندہ سینئر وکیل احسن بھون کے درمیان ہنسی مذاق کا تبادلہ ہوا۔
دورانِ سماعت احسن بھون نے از راہِ مذاق کہا، ’’آج عدالت میں صرف یہ دیکھنے آیا ہوں کہ جج صاحب کیسے ہیں اور کیا چل رہا ہے۔‘‘
جسٹس اعجاز نے مسکراتے ہوئے جواب دیا، ’’آپ کا مطلب ہے کہ ریٹائرمنٹ سے پہلے آخری بار ہمیں دیکھنے آئے ہیں؟‘‘
جس پر احسن بھون نے فوری وضاحت کی، ’’جی نہیں، میرا یہ مطلب ہرگز نہیں تھا۔‘‘
لیکن جسٹس اعجاز نے خوش دلی سے بات کو آگے بڑھاتے ہوئے کہا، ’’بھون صاحب، شکریہ! آپ ہمیں آخری بار دیکھنے آئے، یہ بھی ایک اعزاز ہے۔‘‘
اس خوشگوار لمحے نے عدالت میں موجود تمام افراد کے چہروں پر مسکراہٹ بکھیر دی۔
یاد رہے کہ حال ہی میں جوڈیشل کمیشن نے جسٹس سرفراز ڈوگر کو اسلام آباد ہائیکورٹ کا مستقل چیف جسٹس مقرر کیا ہے اور وہ آج اپنے منصب کا حلف اٹھا رہے ہیں۔ ان کی تقرری کے خلاف ہائیکورٹ کے پانچ ججز کی جانب سے اعتراض دائر کیا گیا تھا، تاہم سپریم کورٹ نے ان کے تبادلے کو آئین و قانون کے مطابق قرار دیا۔ صدرِ مملکت نے بھی جسٹس ڈوگر کو باقاعدہ چیف جسٹس تسلیم کرتے ہوئے ان کی سینیارٹی کی توثیق کی تھی۔
