لاہور (نمائندہ خصوصی) جاوید لطیف کا کہنا ہے کہ سیٹ ایڈجسٹمنٹ سے متعلق حتمی فیصلہ نواز شریف کریں گے،سختیاں جھیلنے والے کارکنوں اور رہنماوں کو انتخابات کیلئے پارٹی ٹکٹ دئیے جائیں گے۔
تفصیلات کے مطابق وفاقی وزیر اور رہنما مسلم لیگ ن جاوید لطیف نے پریس کانفرنس کرتے ہوئے کہا ہے کہ 9 مئی کے ماسٹر مائنڈ کو سزا دینا ضروری ہے،ایک ادارہ خود احتسابی کر رہا ہے تو باقیوں کو بھی گزرنا پڑے گا۔انصاف فراہم کرنے والا ادارہ بھی خود احتسابی کے عمل سے گزرے گا،ایک شخص کو نیچا دکھانے کیلئے جو فیصلے کئے گئے وہ بھی احتساب کے عمل سے گزرے گا۔
ہمارا ہدف وہ لوگ ہیں جن کی وجہ سے پاکستان میں بد امنی اور معاشی بدحالی آئی،اگر اس پروجیکٹ کو لانچ کرنے والے لوگوں کو گرفتار کر کے سزا نہیں دیں گے تو 9 مئی جیسے واقعات دوبارہ ہو سکتے ہیں۔انہوں نے کہا کہ مسلم لیگ ن نے 2013 میں انتخابی اتحاد کے بغیر دو تہائی اکثریت حاصل کی تھی،نواز شریف ووٹ کو عزت دو کے نعرے کی وجہ سے واپس آ رہے ہیں۔سیٹ ایڈجسٹمنٹ کے بارے میں حتمی فیصلہ نواز شریف ہی کریں گے،نواز شریف مخلص کارکنوں کیلئے بڑا پیکج لے کر آ رہے ہیں۔
جاوید لطیف نے بتایا کہ پارٹی کے اندر جن کارکنوں اور رہنماوں نے سختیاں جھیلیں ان کو پارٹی ٹکٹ دی جائے گی۔جو پارٹی کے ساتھ کھڑے نہیں ہوئے ان کے بارے میں فیصلہ نواز شریف خود کریں گے۔ قبل ازیں جاوید لطیف نے چیئرمین سینیٹ اور ڈپٹی چیئرمین سینیٹ کی مراعات میں اضافے پر شدید تحفظات کا اظہار کیا۔انہوں نے کہا کہ سینٹ میں چیئرمین کے حوالے سے جو بل پاس ہوا کیا ایسے حالات میں انہیں یہ مراعات ملنی چاہئیں،چیئرمین سینٹ خود یہ مراعات واپس لیں۔
وفاقی وزیر نے مزید کہا کہ اگر انصاف کے ادارے انصاف نہ دے سکیں تو ملک ترقی نہیں کر سکتا،9 مئی کے واقعات افسوسناک ہیں،چار سال کی ذہن سازی جلد نہیں بدلی جا سکتی،حقائق بتا کر نوجوانوں کے ذہن سے زہر نکالا جائے۔
