نامور اداکارہ زارا ترین نے ایک حالیہ ٹی وی انٹرویو میں اپنی زندگی کے سب سے تکلیف دہ لمحات سے پردہ اٹھایا، جن میں یک طرفہ محبت کے تجربات اور ازدواجی رشتہ ختم ہونے کا دکھ شامل ہیں۔ ان کے یہ بیانات سوشل میڈیا پر وائرل ہو چکے ہیں اور مداحوں میں ہمدردی کی لہر دوڑ گئی ہے۔
زارا ترین نے گفتگو کے دوران بتایا کہ انہیں دو بار یک طرفہ محبت ہوئی، دونوں بار انجام دل شکستگی کی صورت میں نکلا۔ ان کا کہنا تھا، "پہلی بار دل ٹوٹے تو افسوس ہوتا ہے، لیکن دوسری بار خود سے ناراضگی ہوتی ہے کہ کیوں دوبارہ کسی کو موقع دیا۔”
یاد رہے کہ زارا نے 2021 میں پاکستانی نژاد امریکی اداکار فاران طاہر سے شادی کی تھی اور امریکہ منتقل ہو گئی تھیں۔ تاہم ڈیڑھ سال بعد ان کے درمیان علیحدگی کی خبریں سامنے آئیں، جن پر دونوں کی طرف سے طویل خاموشی اختیار کی گئی۔
بعد ازاں، زارا نے سوشل میڈیا پر اپنی طلاق سے متعلق ایک پوسٹ شیئر کی جس میں اس مرحلے کو انتہائی تکلیف دہ اور ذاتی جدوجہد قرار دیا۔ انہوں نے واضح کیا کہ "ازدواجی رشتہ ختم کرنا کوئی آسان فیصلہ نہیں ہوتا، اس کے پیچھے کئی خاموش قربانیاں اور دکھ ہوتے ہیں۔”
انہوں نے مداحوں سے درخواست کی کہ ان کی نجی زندگی میں دخل نہ دیا جائے اور انہیں آگے بڑھنے کا موقع دیا جائے۔
