اسلام آباد (ویب ڈیسک):
بھارتی سرپرستی میں فعال دہشت گرد گروہ "فتنہ الخوارج” کی جانب سے مذہب کے مقدس لبادے میں چھپ کر دہشت گردی اور مساجد کی بے حرمتی کے واضح شواہد منظر عام پر آ گئے ہیں۔ سیکیورٹی ذرائع نے انکشاف کیا ہے کہ اس گروہ کی جانب سے مقدس مقامات کو ڈھال بنا کر انسانی اور اسلامی اقدار کو کھلے عام پامال کیا جا رہا ہے۔
منظر عام پر آنے والی ویڈیوز میں دیکھا جا سکتا ہے کہ بھارتی اسپانسرڈ عناصر مساجد کو نہ صرف پناہ گاہ کے طور پر استعمال کرتے ہیں بلکہ انہی مقدس مقامات سے سیکیورٹی فورسز پر فائرنگ کرتے ہیں۔ یہ شرپسند مسجد میں جوتے پہن کر گھومتے ہیں، جو کہ نہ صرف اسلامی تعلیمات کی کھلی خلاف ورزی ہے بلکہ اس کی حرمت کی سنگین توہین بھی ہے۔
ذرائع کے مطابق، جب یہ عناصر فورسز کے محاصرے میں آ جاتے ہیں تو جان بوجھ کر مساجد کو انسانی شیلڈ کے طور پر استعمال کرتے ہیں تاکہ سیکیورٹی فورسز، مساجد کے تقدس کا لحاظ کرتے ہوئے جوابی کارروائی سے گریز کریں۔ اس حکمتِ عملی کے تحت یہ گروہ بارہا مقدس مقامات اور معصوم شہریوں کو ڈھال کے طور پر استعمال کرتا رہا ہے، جس سے ان کے ناپاک عزائم اور دہشت گردانہ ذہنیت آشکار ہوتی ہے۔
سیکیورٹی حکام نے خبردار کیا ہے کہ بھارتی پشت پناہی سے چلنے والے اس گروہ کا مقصد مذہبی منافرت کو ہوا دینا، ریاستی اداروں کو الجھانا، اور معاشرے میں بدامنی پھیلانا ہے، جس کی روک تھام کے لیے منظم اقدامات کیے جا رہے ہیں۔
