پہلگام واقعے کے بعد پیدا ہونے والی کشیدہ صورتحال کے پیشِ نظر پاکستان کے تمام بڑے ایئرپورٹس پر سیکیورٹی ہائی الرٹ کر دی گئی ہے۔ لاہور کے علامہ اقبال انٹرنیشنل ایئرپورٹ سمیت تمام اہم ہوائی اڈوں پر نگرانی بڑھا دی گئی ہے۔
ایوی ایشن ذرائع کے مطابق بھارتی فضائی حدود سے گزرنے والی غیر ملکی ایئر لائنز پر کڑی نظر رکھی جا رہی ہے، جبکہ بھارتی ایئر لائنز پر پابندی برقرار ہے۔
ایئر ٹریفک کنٹرول کو ہدایت دی گئی ہے کہ کسی بھی مشکوک طیارے کو ائیر ڈیفنس نمبر کے بغیر کلیئرنس نہ دی جائے۔ کپتان سے پری-ڈیپارچر پر ائیر ڈیفنس نمبر طلب کیا جائے گا۔
تمام اداروں کے ملازمین کو ہدایت کی گئی ہے کہ وہ اپنے شناختی کارڈز ہمراہ رکھیں۔ بغیر شناخت کسی بھی اہلکار کی آمد و رفت پر پابندی عائد ہوگی۔
سیکیورٹی فورسز اور متعلقہ اداروں کو آپس میں مؤثر کوآرڈینیشن کے لیے بھی اقدامات تیز کرنے کی ہدایات دی گئی ہیں تاکہ کسی بھی ہنگامی صورتحال سے فوری طور پر نمٹا جا سکے۔
