گریٹر نوئیڈا:
پاکستان سے اپنے شوہر کو چھوڑ کر محبت کی خاطر بھارت پہنچنے والی سیما حیدر پر نئی مصیبت آن پڑی۔ بھارتی حکومت نے انہیں تین دن کے اندر ملک چھوڑنے کا حکم جاری کر دیا ہے۔
انڈیا ٹوڈے کے مطابق، پہلگام واقعے کے بعد بھارت نے پاکستانی شہریوں کے ویزے منسوخ کرنے کا فیصلہ کیا ہے۔ اسی حکم کی زد میں سیما حیدر بھی آ گئی ہیں۔
سیما کے وکیل اے پی سنگھ کا کہنا ہے کہ ان کی موکلہ اب پاکستان کی شہری نہیں رہی، کیونکہ انہوں نے بھارتی شہری سچن مینا سے شادی کرلی ہے اور ان کی ایک بیٹی بھی ہے جس کا نام بھارتی مینا رکھا گیا ہے۔
وکیل نے مزید کہا کہ شادی کے بعد عورت کی شہریت شوہر کی شہریت کے ساتھ جڑ جاتی ہے، لہٰذا حکومتی احکامات کا اطلاق سیما پر نہیں ہونا چاہیے۔ سیما کا نام اور سچن کا نام سرکاری دستاویزات میں بھی درج ہے، جس سے ان کی بھارتی معاشرے میں شمولیت ثابت ہوتی ہے۔
خیال رہے کہ سیما حیدر مبینہ طور پر نیپال کے راستے بھارت پہنچی تھیں، جہاں وہ اس وقت گریٹر نوئیڈا میں مقیم ہیں۔
بھارتی وزارت خارجہ نے اعلان کیا ہے کہ تمام پاکستانی شہریوں کے ویزے 27 اپریل سے منسوخ کر دیے جائیں گے اور میڈیکل ویزے 29 اپریل تک کارآمد ہوں گے۔
