اسلام آباد میں "لیڈرز ان اسلام آباد بزنس سمٹ” کے دوران برطانوی ہائی کمشنر جین میریٹ نے کہا کہ برطانیہ، پاکستان کی معیشت کو دو ٹریلین ڈالر کی سطح تک پہنچانے کے لیے مکمل شراکت داری کے لیے تیار ہے۔
جین میریٹ کا کہنا تھا کہ پاکستان کے اصلاحاتی اقدامات قابلِ تحسین ہیں اور برطانیہ نہ صرف ان کی مکمل حمایت کرتا ہے بلکہ عملی تعاون کے لیے بھی تیار ہے۔ انہوں نے پاکستان کو ایک ابھرتی ہوئی نوجوان قوم قرار دیا اور کہا کہ برطانیہ پاکستان کے ساتھ تجارت، صحت، تعلیم، توانائی اور ماحولیاتی تبدیلی جیسے اہم شعبوں میں تعاون کو مزید فروغ دے رہا ہے۔
ان کا مزید کہنا تھا کہ برطانیہ دنیا کی تیسری بڑی معیشت ہونے کے ناتے پاکستان کے ساتھ اسٹرٹیجک شراکت داری میں دلچسپی رکھتا ہے۔ موجودہ باہمی تجارت 4.4 ارب پاؤنڈ ہے جسے آئندہ سالوں میں 10 ارب پاؤنڈ تک لے جانے کا ہدف ہے۔
انہوں نے 45 ملین ڈالر کے ایک معاشی پروگرام کا ذکر کیا جو پاکستان میں میکرو اکنامک اصلاحات میں مدد دے رہا ہے۔ جین میریٹ نے "ریکوڈک” جیسے بڑے منصوبوں میں تعاون اور کلین انرجی پر کام جاری رکھنے کے عزم کا اظہار بھی کیا۔
