باقاعدہ دعوت نامہ ملا تو آل پارٹیز کانفرنس میں شرکت پر مشاورت کرینگے ‘فواد چوہدری

لاہور ( نمائندہ خصوصی) پاکستان تحریک انصاف کے سنیئر رہنما فواد چوہدری نے کہا ہے کہ آل پارٹیز کانفرنس (اے پی سی) کے لیے پی ٹی آئی کو دعوت نامہ نہیں ملا۔

سماجی رابطے کی ویب سائٹ ٹوئٹر پر جاری کیے گئے پیغام میں فواد چوہدری نے کہا کہ شہباز شریف نے میڈیا پر دہشت گردی معاملے پر آل پارٹیز کانفرنس میں تحریک انصاف کو شمولیت کی دعوت دی ہے۔ابھی تک اس ضمن میں تحریک انصاف کو کوئی دعوت نامہ نہیں ملا۔

انہوں نے کہا کہ باقاعدہ دعوت نامہ ملا تو اس کانفرنس میں شرکت پر مشاورت کریں گے۔واضح رہے کہ وزیراعظم شہباز شریف نے پہلے 7فروری اور پھر تاریخ تبدیل کر کے 9فروری کو اسلام آباد میں کل جماعتی کانفرنس بلا ئی ہے، جس میں پاکستان تحریک انصاف کو بھی شرکت کی دعوت دی ہے۔وزیراعظم نے پی ٹی آئی کو اپیکس کمیٹی کے اجلاس میں بھی شرکت کی دعوت دی تھی، جس میں پی ٹی آئی نے شرکت نہیں کی تھی۔