ملتان: پاکستان کے سابق چیف جسٹس، جناب تصدق حسین جیلانی کو قانون کی حکمرانی اور انسانی حقوق کے فروغ میں نمایاں خدمات کے اعتراف میں عالمی سطح پر بولچ ایوارڈ سے نوازا گیا ہے۔
یہ اعزاز انہیں عدلیہ کی آزادی، اقلیتوں کے حقوق، اور خواتین کے تحفظ جیسے اہم شعبوں میں مثالی کردار ادا کرنے پر دیا گیا۔ اپنے دورِ عدلیہ میں انہوں نے کئی اہم فیصلوں کے ذریعے شخصی آزادیوں کو تقویت دی۔
جسٹس جیلانی نے پرویز مشرف کے دورِ حکومت میں پی سی او کے تحت حلف لینے سے انکار کرتے ہوئے اصولی مؤقف اپنایا، جس کے باعث انہیں عہدہ چھوڑنا پڑا۔ بعد ازاں، وہ سپریم کورٹ میں بحال ہوئے اور انصاف کی سربلندی کے لیے اپنے سفر کو جاری رکھا۔
بولچ انسٹی ٹیوٹ کے ڈائریکٹرز نے انہیں جمہوریت، مساوات اور مذہبی رواداری کا نمونہ قرار دیا۔
