لاہور (نمائندہ خصوصی) تحریک انصاف کے رہنما فواد چوہدری کا کہنا ہے کہ اس عید پر علی امین گنڈا پور،اعصام الحق اور درجنوں دیگر کارکنان کو اپنی خصوصی دعاوں میں یاد رکھیں۔
فواد چوہدری نے ٹویٹر پر جاری اپنے بیان میں مزید کہا کہ یہ لوگ ان ہزاروں لوگوں میں شامل ہیں جو پاکستان میں جمہوریت کیلئے جدوجہد کرتے ہوئے اس فسطائی حکومت کے نشانے پر آئے اور ظلم برداشت کر رہے ہیں۔قبل ازیں فواد چوہدری کا کہنا تھا کہ ہماری ایک ہی شرط ہے بات چیت آئین سے ماورا نہیں ہو گی،سپریم کورٹ نے کہا ہے کہ پنجاب کے انتخابات کیلئے 14 مئی سے تاریخ آگے نہیں جائے گی۔ مذاکرات کیلئے سازگار ماحول ہونا چاہیے لیکن پی ٹی آئی کے 3500 کارکنوں کو گرفتار کر لیا گیا۔کل رات ہمارے سوشل میڈیا ایکٹیوسٹ عطاءالرحمان کو اٹھا لیا گیا۔
انہوں نے کہا کہ حکومت زمان پارک میں دوبارہ آپریشن کروا چاہتی ہے جس سے تلخیاں بڑھیں گی،آپ سیاسی درجہ حرارت کو بڑھائیں گے تو مسائل حل نہیں ہوں گے۔ جبکہ شاہ محمود قریشی نے گزشتہ روز انتخابات ایک ساتھ کرانے کے کیس میں م¶قف اپنایا کہ مذاکرات سے کبھی پیچھے نہیں ہٹے تاہم مذاکرات آئین سے بالا تک نہیں ہو سکتے۔ حکومت اپنی تجاویز دے جس کا جائزہ لیں گے اور عمران خان کی طرف سے کہتے ہیں راستہ نکالنے کی کوشش کریں گے۔آئین 90 روز میں انتخانات کرانے سے متعلق واضح ہے،کسی کی خواہش کا نہیں آئین کا تابع ہوں،سپریم کورٹ نے انتخابات سے متعلق فیصلہ دیا،عدالتی فیصلے پر عملدرآمد میں رکاوٹیں کھڑی کی گئیں۔عدالت نے تحمل کا مظاہرہ اور آئین کا تحفظ کیا،تلخی کے بجائے آگے بڑھنے کیلئے آئے ہیں،سیاسی قوتوں نے مل کر ملک کو دلدل سے نکالنا ہے۔
