سرگودھا (تعلیم ڈیسک) پانچ سالہ تعلیمی وژن پیش کرنے کیلئے یونیورسٹی آف سرگودھا کے زیرِ اہتمام ”علم کا مستقبل” کے عنوان سے چار روزہ کانفرنس کا آغاز ہو گیا۔
کانفرنس کا اہتمام مظفر آباد آزاد کشمیر میں کیا جا رہا ہے، کانفرنس کی افتتاحی تقریب کے مہمان خصوصی چیئرمین ہائیر ایجوکیشن کمیشن اسلام آباد پروفیسر ڈاکٹر مختار احمد تھے۔
اس موقع پر وائس چانسلر یونیورسٹی آف سرگودھا پروفیسر ڈاکٹر قیصر عباس’ پرو وائس چانسلر پروفیسر ڈکٹر الیاس طارق’ ڈین فیکلٹی آف آرٹس اینڈ ہیومنٹیز پروفیسر ڈاکٹر غلام عباس’ ڈین فیکلٹی آف ایگری کلچر پروفیسر ڈاکٹر اطہر ندیم’ یونیورسٹی کے سینئر اساتذہ’ مختلف شعبہ جات کے چیئرمین اور افسران جامعہ بھی موجود تھے۔ غیر معمولی اہمیت کی حامل اس کانفرنس سے خطاب کرتے ہوئے چیئرمین ہائیر ایجوکیشن کمیشن پروفیسر ڈاکٹر مختار احمد نے کہا کہ تیزی سے بدلتی ہوئی دنیا میں ترقی یافتہ اقوام کا مقابلہ کرنے اور پاکستان کو ترقی کی راہ پر ڈالنے کے لئے ہمیں اپنے ذہنوں میں نشان راہ کو تازہ کرتے ہوئے نئے نظریات اورمثبت سوچ کے ساتھ آگے بڑھنا ہوگا۔
قدرت نے پاکستان کو بے پناہ ٹیلنٹ سے نوازا ہے اور ہمیں مایوس ہونے کی بجائے اپنا علمی سفر محنت اور مستقل مزاجی سے جاری رکھنا ہوگا۔ پروفیسر ڈاکٹر مختار احمد نے مزید کہا کہ ایک کامیاب اور عظیم استاد وہی ہے جو اپنی علمی ذمہ داریاں نبھاتے ہوئے ایسی تحقیقی کرے جس کا براہ راست فائدہ ہمارے معاشرے اور ملک و ملت کو ہو۔ انہوں نے مزید کہا کہ وائس چانسلر پروفیسر ڈاکٹر قیصر عباس کو بہت اچھی ٹیم ملی ہے جس میں قدرتی صلاحیت سے مالا مال استاد اورمحنتی افسران اپنی ذمہ داریاں نبھا رہے ہیں۔
انہوں نے کہا کہ جو اساتذہ خود کو جدید تقاضوں سے ہم آہنگ نہیں کرتے زمانہ انہیں پیچھے چھوڑ جاتا ہے۔ اس لئے اساتذہ اپنے آپ کو وقت کے ساتھ ساتھ اپ گریڈ کریں۔ کانفرنس سے خطاب کرتے ہوئے وائس چانسلر یونیورسٹی آف سرگودھا پروفیسر ڈاکٹر قیصر عباس نے کہا کہ آگے بڑھنے کے لئے اور کسی بھی تعلیمی ادارے کو بہتر بنانے کے لئے مستقبل کا ایک لائحہ عمل بہت ضروری ہے۔
یونیورسٹی آف سرگودھا ہائیر ایجوکیشن کمیشن کی بہترین علمی پالیسیوں پر عمل کرتے ہوئے تعلیم و تحقیق اور نئے نظریات سامنے لانے کے وژن پر کام کررہی ہے۔ پروفیسر ڈاکٹر قیصر عباس نے مزید کہا کہ یونیورسٹی آف سرگودھا نے چند ماہ میں علمی تحقیقی اور ڈویلپمنٹ کے کاموں میں غیر معمولی حاصلات کی ہیں اور اس کام کو مزید بہتر بنانے کے لئے اپنی فیکلٹی اور انتظامی افسران کو پانچ سالہ پروگرام دیا ہے جس کے وژن پر عمل کرتے ہوئے ہم ہر سال آگے بڑھیں گے۔
کانفرنس سے خطاب کرتے ہوئے پرو وائس چانسلر پروفیسر ڈاکٹر الیاس طارق نے کہا کہ مظفر آباد آزاد کشمیر میں آنے کا مقصد اپنے اساتذہ کو یونیورسٹی کے علمی سفر پر گامزن کرنا ہے اور اس کا تمام سہرا وائس چانسلر یونیورسٹی آف سرگودھا پروفیسر ڈاکٹر قیصر عباس کو جاتا ہے۔
انہوں نے اس موقع پر چیئرمین ہائیر ایجوکیشن کمیشن پروفیسر ڈاکٹر مختار احمد کاکانفرنس کے انعقاد اور سپورٹ کرنے پر بے حد شکریہ ادا کیا۔ کانفرنس کی خاص بات یہ ہے کہ یونیورسٹی کے اساتذہ اور افسران اگلے پانچ سال کا وژن پیش کریں گے اور آنے والے پانچ سالوں میں یونیورسٹی آف سرگودھا کی تعلیمی، تحقیقی و انتظامی ترقی کے خد و خال واضح کریں گے۔
