بین الاقوامی انسانی اسمگلنگ کے نیٹ ورک کا مرکزی کردار اور یونان کشتی حادثے کا اہم ترین ملزم آخرکار قانون کی گرفت میں آ گیا۔
ایف آئی اے کے ترجمان کے مطابق، گجرانوالہ زون نے انٹرپول کی مدد سے انسانی اسمگلنگ میں ملوث انتہائی مطلوب ملزم عمران عرف ٹونی کو مصر سے گرفتار کرلیا ہے۔ ملزم کو ضروری قانونی کارروائی مکمل کرنے کے بعد ایف آئی اے گجرانوالہ کے حوالے کر دیا گیا ہے۔
عمران ٹونی ریڈ بک میں شامل انتہائی مطلوب انسانی اسمگلرز میں شمار ہوتا ہے اور 2023 میں پیش آنے والے بدنام زمانہ یونان کشتی حادثے میں براہِ راست ملوث تھا۔
ایف آئی اے کے مطابق، ٹونی 2012 سے لیبیا میں مقیم تھا اور وہیں سے غیر قانونی انسانی اسمگلنگ کا خطرناک نیٹ ورک چلا رہا تھا۔ وہ سیف ہاؤسز کے ذریعے نوجوانوں کو سمندر کے راستے یورپ بھیجنے میں ملوث رہا ہے۔
تحقیقات کے مطابق، ملزم نے درجنوں شہریوں سے لاکھوں روپے وصول کیے اور انہیں غیر قانونی طریقے سے بیرون ملک بھجوانے کی کوشش کی، جس پر اس کے خلاف کئی مقدمات درج ہیں۔
ایف آئی اے نے تفتیش کا آغاز کر دیا ہے جبکہ ملزم کے دیگر ساتھیوں کی تلاش کے لیے چھاپے مارے جا رہے ہیں۔
