پشاور(نیوز رپورٹر ) مشیراطلاعات خیبر پختونخوا بیرسٹر سیف نے کہا ہے کہ گورننس گیپ کا بیان جعلی وفاقی حکومت کے منہ پر زناٹے دار طمانچہ ہے، وفاق میں چچا اور پنجاب میں بھتیجی نے بیڈ گورننس کے ریکارڈ قائم کیے، وفاق کی افغانستان کے ساتھ سردمہری نے بھی پورے خطے کے امن کو سبوتاژ کیا ہے۔
اپنے ایک بیان میں بیرسٹر سیف نے وفاقی حکومت اور وزیر اعلی پنجاب کو ایک بار پھر سے تنقید کا نشانہ بناتے ہوئے کہا کہ جعلی حکومت کا ملک میں بیڈ گورننس، دہشت گردی کو فروغ دینے کا سبب بن رہی ہے، وفاق خیبر پختونخوا کے فنڈز روک کر صوبے میں بھی بیڈ گورننس کو فروغ دینے کی ناکام کوشش کر رہا ہے۔
مشیر اطلاعات خیبر پختونخوا نے بیان میں کہا کہ خیبر پختونخوا دہشت گردی سے سب سے زیادہ متاثرہ صوبہ ہے، ہمارے صوبے کے ساتھ سوتیلی ماں جیسا سلوک بند کرنا ہوگا۔بیرسٹر سیف کا کہنا ہے کہ دہشت گردی کے خلاف صوبے کی مدد نہ کرنا وفاقی حکومت کی بے حسی کی انتہا ہے، وفاقی حکومت خیبر پختونخوا اور بلوچستان میں دہشت گردی کا محض تماشا دیکھ رہی ہے۔ افغانستان کے ساتھ خراب تعلقات کا براہ راست اثر خیبر پختونخوا اور پورے ملک پر پڑ رہا ہے۔
