اسلام آباد(نمائندہ خصوصی)نگران وزیراعظم انوار الحق کاکڑ نے کہا ہے کہ گورننس میں بہتری کیلئے سول اداروں کی کارکردگی کو بتدریج بہتر بنایا جارہا ہے،بجلی چوری، ذخیرہ اندوزی اور سمگلنگ کی روک تھام کیلئے چاروں صوبوں میں بہترین کام ہورہا ہے، جہاں ضرورت ہوگی فوج کی خدمات بھی حاصل کی جائیں گی،بجلی چوری کی روک تھام کیلئے اقدامات کو مزید موثر بنانے کی ضرورت ہے ۔
ان خیالات کا اظہار انہوں نے جمعہ کو بجلی چوری ،ذخیرہ اندوزی اور سمگلنگ کی روک تھام کے حوالے سے منعقدہ اجلاس کی صدارت کے دوران گفتگوکرتے ہوئے کیا۔ وزیراعظم نے کہاکہ نگران حکومت گورننس کے حوالے سے اپنی ذمہ داریاں ادا کررہی ہے،ذخیرہ اندوزی، مہنگائی اورسمگلنگ کے حوالے سے صوبوں اورمتعلقہ اداروں کے ساتھ مل کرحکمت عملی وضع کی گئی ہے،لوگوں میں یہ تاثرتھا کہ یہ ایک ہفتے یا چند دن کی مہم ہے لیکن میں واضح کرنا چاہتا ہوں کہ یہ ہفتے دو ہفتے کی بات نہیں ہے، پاکستان کی اقتصادی صحت کے حوالے سے اقدامات جاری رہیں گے۔
وزیراعظم نے کہاکہ گزشتہ کچھ روز سے ذخیرہ اندوزی ، مہنگائی،شرح مبادلہ اور بجلی چوری کے حوالے سے جو اقدامات کئے جارہے ہیں انہیں مزید موثر بنانے کی ضرورت ہے،متعلقہ اور قانون نافذ کرنے والے اداروں نے اپنا کام شروع کردیا ہے، پہلے یہ معلوم ہی نہیں تھا کہ یہ کس کا کام ہے، اس رجحان کوبدلنے کی ضرورت ہے،بیورو کریسی،پولیس اورمتعلقہ ادارے مل کرکام کریں گے اور گورننس کیلئے جہاں ضرورت ہوگی فوج کی خدمات بھی حاصل کی جائیں گی جو کہ ایک بہترین اورمنظم ادارہ ہے، اس کیساتھ ساتھ سول اداروں کی کارکردگی کو بہتربنایاجائے گا جو وقت کی ضرورت ہے، سول اداروں کی استعداد کارمیں اضافے سے ان کی کارکردگی اور کردار میں بہتری آتی جائے گی۔
وزیراعظم نے اداروں کواپنی اپروچ کو بہتر بنانے اوروسائل کوبروئے کار لانے کی ضرورت پر زور دیتے ہوئے کہاکہ چارو ں صوبوں میں حکومتی اقدامات کے بہتر نتائج سامنے آرہے ہیں ، چیف سیکرٹریز اورآئی جیزبہترین کام کررہے ہیں،ذخیرہ اندوزی اورسمگلنگ کے خلاف بالخصوص بلوچستان اورخیبرپختونخوا میں بہترین اقدامات کئے گئے ہیں، آئی بی کا اس حوالے سے بہت اہم کردار ہے۔ انہوں نے گورننس کو بہتر بنانے اورسمگلنگ اورذخیرہ اندوزی کے خلاف کوششوں کو مربوط بنانے کی ضرورت پر زوردیتے ہوئے کہاکہ اس حوالے سے اجتماعی کوششوں کی ضرورت ہے۔
