کراچی(نمائندہ خصوصی)میئر کراچی مرتضی وہاب نے کہا ہے کہ کراچی کی ترقی میں سب سے بڑی رکاوٹ منفی سوچ ہے، کیا ایک شخص کی انا شہر کراچی سے بڑی ہے؟
خصوصی گفتگو کرتے ہوئے انہوں نے کہا کہ کراچی کی ترقی میں سب سے بڑی رکاوٹ منفی سوچ ہے، منفی سوچ کو ختم کرنے میں کامیاب ہوگئے تو مسائل حل ہونا شروع ہوجائیں گے، پیپلزپارٹی کے پاس اب کے ایم سی کی ذمہ داری آئی ہے۔
جماعت اسلامی کو 130اور پیپلزپارٹی کو 155نشستیں ملیں، کیا ایک شخص کی انا پورے شہر سے بڑی ہے؟ کراچی کے عوام فیصلہ کریں گے کہ پیپلزپارٹی نے کام کیا یا نہیں۔انہوں نے کہاکہ کراچی کے13ٹائون پیپلزپارٹی اور 9ٹائون جماعت اسلامی کے پاس ہیں، کراچی کی ترقی کیلئے سب سے اہم یہ ہے کہ اختلافات کو بالائے طاق رکھ کر مسائل حل کریں۔
میئر کراچی نے کہا کہ سب کو کہتا ہوں کہ مل کر بیٹھیں تاکہ 4سال بعد عوام کو بتائیں کیا کام کیے، سیاسی اختلافات کو الگ رکھ کراچی کی ترقی پر دھیان دینا چاہیے۔انہوں نے کہا کہ آئیں سب مل کر کراچی کی ترقی کیلیے کام کریں، کراچی میں ایک دوسرے کو نہیں بلکہ مسائل کو چیلنج کرنا چاہیے۔
