کوٹ لکھپت جیل میں قید 21خواتین سے انتقام کی آڑ میں کسی نہ کسی بہانے مسلسل ضمانت سے انکار کیا جارہاہے ، عمر ایوب

اسلام آباد (نمائندہ خصوصی) پاکستان تحریک انصاف کے سیکرٹری جنرل عمر ایوب نے کہاہے کہ کوٹ لکھپت جیل میں قید 21خواتین سے انتقام کی آڑ میں کسی نہ کسی بہانے مسلسل ضمانت سے انکار کیا جارہاہے ۔

اپنے ٹوئٹ میں عمر ایوب نے کہاکہ گزشتہ 4 ماہ سے 21 خواتین لاہور کی کوٹ لکھپت جیل میں قید ہیں، ان خواتین سے انتقام کی آڑ میں کسی نہ کسی بہانے مسلسل ضمانت سے انکار کیا جا رہا ہے۔ عمر ایوب نے کہاکہ یہ انسانی حقوق کی خلاف ورزی کے زمرے میں آتا ہے، میں نے سابق ایم این اے عالیہ حمزہ ملک کے ساتھ اس وقت کام کیا جب وہ ایم این اے اور پارلیمانی سیکرٹری کامرس تھیں۔

عمر ایوب نے کہاکہ عالیہ حمزہ شاندار کارکردگی دکھانے والوں میں سے ایک ہیں قومی اسمبلی کے فلور پر سوالات کے جوابات دیتے وقت یا میڈیا میں پیش ہوتے ہوئے ہمیشہ تیار، واضح اور درستگی کے ساتھ سامنے آئیں۔ انہوںنے کہاکہ ڈاکٹر یاسمین راشد صاحبہ سابق وزیر صحت پنجاب اور پی ٹی آئی صدر سنٹرل پنجاب ہیں، ایک لفظ ان کی تعریف بالکل ٹھیک بیان کرتا ہے اور وہ ہے آئرن لیڈی۔ انہوںنے کہاکہ یاسمین راشد صاحبہ ایک گراس روٹس ورکر ہیں جنکے دل میں لوگوں کے لئے ہمدردی ہے، روبینہ جمیل صاحبہ ایم این اے ہونے پر ان کے ساتھ کام کیا، جنہوں نے ہمیشہ پاکستان کیلئے قومی اسمبلی کے فلور اور میڈیا پر بہت واضح اور یقین کے ساتھ بات کی۔

عمر ایوب نے کہاکہ روبینہ جمیل بنیادی طور پر محب وطن اور ان کے شوہر نے پاکستان آرمی میں اپنی خدمات انجام دیں، خدیجہ شاہ ایک کاروباری شخصیت ہیں، سابق آرمی چیف جنرل آصف نواز کی نواسی ہیں۔ انہوںنے کہاکہ خدیجہ شاہ سے میری ملاقات انکے دادا جنرل آصف نواز صاحب (مرحوم) کے ساتھ ہوئی جو اس وقت کمانڈنٹ پی ایم اے کے طور پر خدمات انجام دے رہے تھے،اس وقت وہ کم عمر تھیں، وہ اپنے دادا اور والدین کی پسندیدہ تھیں۔