بالی وڈ کی معروف اداکارہ کرشمہ کپور کی نجی زندگی ایک بار پھر خبروں کی زینت بن گئی ہے، جب فلم ساز و ہدایتکار سنیل درشن نے ان کی مرحوم سابق شوہر سنجے کپور سے شادی اور ازدواجی زندگی کے بارے میں حیران کن باتیں سامنے رکھ دیں۔
سنیل درشن، جنہوں نے کرشمہ کپور کے ساتھ کئی فلموں میں بطور ہدایتکار کام کیا، کا کہنا ہے کہ شادی کے بعد کرشمہ اپنی شناخت کھو بیٹھی تھیں۔ وہ ایک سادہ، محبت بھری گھریلو زندگی کی خواہاں تھیں، مگر حقیقت میں انہیں ایک "ٹرافی وائف” بنا دیا گیا، جو ان کے مزاج سے میل نہیں کھاتی تھی۔
ان کے مطابق کرشمہ اور سنجے کی شادی خود کرشمہ کے بچپن کی سہیلی کے بھائی سے ہوئی، مگر دہلی کے اشرافیہ طرزِ زندگی میں وہ خود کو ایڈجسٹ نہیں کر پائیں۔ دونوں کے نظریات اور شخصیات میں واضح فرق تھا، جو اس تعلق کو دیرپا نہ بنا سکا۔
2003 میں شادی اور 2016 میں طلاق کے درمیان، اس جوڑے کے ہاں ایک بیٹا اور بیٹی پیدا ہوئے۔ سنیل درشن نے یہ بھی انکشاف کیا کہ طلاق کے وقت سنجے پر کرشمہ کو اپنے دوستوں کے ساتھ "قربت پر مجبور کرنے” اور تشدد جیسے الزامات بھی لگے تھے، مگر وقت گزرنے کے ساتھ دونوں نے بچوں کی خاطر تعلقات بہتر بنا لیے۔
سنجے کپور کی حالیہ موت کے بعد کرشمہ نہ صرف آخری رسومات میں شریک ہوئیں بلکہ بچوں کے ہمراہ دعائیہ تقریب میں بھی موجود رہیں، جو اس بات کا ثبوت ہے کہ اختلافات کے باوجود دونوں نے والدین کی ذمے داری کو مقدم رکھا۔
