کراچی میں سندھ رینجرز کی بڑی کارروائی، فتنۃ الخوارج کے تین اہم کارندے گرفتار

سندھ رینجرز نے خفیہ اطلاع پر منگھوپیر روڈ کے علاقے کنواری کالونی میں کارروائی کرتے ہوئے شدت پسند تنظیم فتنۃ الخوارج سے تعلق رکھنے والے تین انتہائی مطلوب کارندوں کو گرفتار کرلیا۔

ترجمان رینجرز کے مطابق گرفتار ملزمان میں زید اللہ عرف زیدو، نورزادہ اور حضرت عثمان شامل ہیں، جو تنظیم کے امیر شمس القیوم عرف زاویل عرف زعفران کے قریبی ساتھی بتائے جاتے ہیں۔

ابتدائی تفتیش میں ملزمان نے انکشاف کیا کہ وہ علاقے کے رہائشیوں کے فون نمبرز شمس القیوم کو فراہم کرتے تھے، جو ان نمبرز پر بھتہ وصولی کے لیے کال کرتا تھا۔ ملزمان نے کنواری کالونی میں منشیات فروشوں سے بھتہ لینے اور زمینوں پر قبضے کی وارداتوں میں بھی ملوث ہونے کا اعتراف کیا۔

ترجمان نے مزید بتایا کہ گرفتار ملزم نورزادہ کا بھائی خان زادہ عرف حنظلہ اور حضرت عثمان کا بھائی عمر خطاب بھی تنظیم کے انتہائی مطلوب کارندے تھے، جو پہلے ہی ہلاک ہوچکے ہیں۔

ذرائع کے مطابق زید اللہ عرف زیدو تھانہ ایکسائز کورنگی اور اے این ایف کو بھی مختلف مقدمات میں مطلوب تھا۔ گرفتار ملزمان کو مزید تفتیش اور قانونی کارروائی کے لیے پولیس کے حوالے کردیا گیا ہے۔