کراچی کے علاقے سائٹ بی کی حدود میں ایک ہی گھنٹے میں پیش آنے والے دو الگ الگ ٹریفک حادثات میں دو افراد جاں بحق اور ایک زخمی ہوگیا۔
پہلا حادثہ شیر شاہ گلبائی کے قریب پیش آیا، جہاں ایک تیز رفتار ٹرک نے 58 سالہ راہ گیر خاتون غلام سکینہ کو کچل دیا۔ وہ اسپتال سے گھر واپس جا رہی تھیں۔ ٹرک کو پولیس نے قبضے میں لے لیا تاہم ڈرائیور فرار ہوگیا۔
دوسرا حادثہ غنی چورنگی پر پیش آیا، جہاں ایک کاپر لدی مزدا ٹرک کھڑے ٹرالر سے ٹکرا گئی۔ تصادم میں 25 سالہ کلینر مرتضیٰ موقع پر جاں بحق جبکہ ڈرائیور ریاض زخمی ہو گیا۔
پولیس نے دونوں گاڑیاں تحویل میں لے کر تحقیقات کا آغاز کر دیا ہے۔ ریسکیو رپورٹ کے مطابق، رواں سال کراچی میں 271 سے زائد اموات ٹریفک حادثات میں ہو چکی ہیں، جن میں سے 87 سے زائد اموات ہیوی گاڑیوں کے سبب ہوئیں۔
