کراچی میں عائشہ منزل کے قریب ایک افسوسناک واقعے میں نامعلوم مسلح افراد نے مویشیوں کے ایک بیوپاری سے دنبوں سے بھرا چنگچی لوڈر رکشہ اور موبائل فون چھین لیا اور فرار ہو گئے۔
متاثرہ بیوپاری محمد راشد سلیم، جو کہ ایف سی ایریا لیاقت آباد کا رہائشی اور پیشے کے لحاظ سے حجام ہے، نے بتایا کہ وہ عیدالاضحیٰ کے موقع پر عارضی طور پر دنبوں کی خرید و فروخت کرتا ہے۔ 29 مئی کو پیالہ ہوٹل کے نزدیک قربانی کے جانور فروخت کرنے کے بعد وہ تین دنبے لے کر گھر واپس جا رہا تھا کہ راستے میں واردات کا نشانہ بن گیا۔
راشد کے مطابق، جب وہ عزیز آباد تھانے کی حدود میں واقع عائشہ منزل پل کے قریب پہنچا تو دو موٹر سائیکلوں پر سوار چار مسلح ملزمان نے اسے روک کر اسلحے کے زور پر نہ صرف تینوں دنبے بلکہ اس کا موبائل فون بھی چھین لیا اور فرار ہوگئے، جس سے اسے بھاری مالی نقصان برداشت کرنا پڑا۔
ایس ایچ او عزیز آباد، عامر اعظم نے واقعے کی تصدیق کرتے ہوئے بتایا کہ پولیس نے متاثرہ شہری کی شکایت پر مقدمہ الزام نمبر 291/2025 بجرم دفعہ 392، 397 اور 34 کے تحت درج کر کے تفتیش شروع کر دی ہے۔ جائے واردات کا معائنہ کرنے کے بعد سی سی ٹی وی فوٹیج بھی حاصل کر لی گئی ہے، اور ملزمان کی تلاش کے لیے اقدامات جاری ہیں۔
انہوں نے مزید بتایا کہ عیدالاضحیٰ کے تناظر میں عزیز آباد کی حدود میں پولیس کی گشت میں اضافہ کر دیا گیا ہے تاکہ شہریوں کے جان و مال کا تحفظ یقینی بنایا جا سکے۔
