سندھ کے شہروں کراچی اور میرپور خاص میں فلسطین کے حق میں احتجاج کے دوران ’کے ایف سی‘ اور ’ڈومینوز‘ کی چار برانچز پر حملے ہوئے، جس میں توڑ پھوڑ اور جلاؤ گھیراؤ کے الزامات کے تحت تین مقدمات درج کیے گئے اور 24 افراد کو گرفتار کر لیا گیا۔
پہلا واقعہ کراچی کے علاقے خیابان اتحاد کورنگی روڈ پر پیش آیا، جہاں مشتعل افراد نے ’کے ایف سی‘ کی برانچ پر حملہ کیا۔ برانچ کے مینیجر کی مدعیت میں درج کیے گئے مقدمے میں کہا گیا کہ منگل کی شام 50 کے قریب مشتعل افراد ڈنڈے، ہتھوڑے اور اینٹوں سے مسلح ہو کر برانچ میں داخل ہوئے اور توڑ پھوڑ کی۔
مینیجر کے مطابق، ہنگامہ آرائی میں برانچ میں موجود صارفین یا عملے کو کوئی جانی نقصان نہیں پہنچا، تاہم فرنیچر اور ایل ای ڈی کو نقصان پہنچایا گیا۔ توڑ پھوڑ کے بعد جب مینیجر نے باہر جا کر دیکھا تو ڈومینوز پیزا کی برانچ بھی متاثر ہوئی تھی، جہاں مشتعل افراد نے شیشے توڑے اور کولڈ ڈرنکس اٹھا کر لے گئے۔
کراچی پولیس کے ڈی آئی جی اسد رضا نے بی بی سی اردو کو بتایا کہ اس واقعے میں 10 افراد کو گرفتار کیا گیا ہے، جنہوں نے ایک فیس بک پیج کے ذریعے فاسٹ فوڈ شاپس پر حملے کی ترغیب دی تھی۔ انہوں نے مزید کہا کہ گرفتار افراد کی رہائی کے لیے تحریک لبیک پاکستان کے افراد تھانے آئے تھے
