اسلام آباد (نیوز رپورٹر)سنی اتحاد کونسل کے سربراہ صاحبزادہ حامد رضا نے انکشاف کیا ہے کہ کالعدم تنظیموں کی ہٹ لسٹ پر ہوں مجھ سے سیکیورٹی پہلے ہی لے لی گئی ہے۔
ایک انٹرویو میں صاحبزادہ حامد رضا نے کہا گزشتہ روز ایک جگہ بیٹھا ہوا تھا تو بڑی تعداد میں پولیس نفری آئی، کالعدم تنظیموں کی ہٹ لسٹ پرہوں، 3 ساڑھے 3 گھنٹے کیلئے بڑی تعداد میں اہلکاروں نے آکر سیکیورٹی دی۔حامد رضا نے کہا کہ جس آفس میں تھا یہاں سے کچھ عرصے پہلے ایم پی اے کو گرفتار کیا گیا تھا، حکومت کیساتھ مذاکرات ختم سمجھیں۔ انھوں نے کہا کہ بانی پی ٹی آئی کا پیغام آیا کہ جوڈیشل کمیشن نہیں بنتا تو مذاکرات نہ کریں، پہلی میٹنگ میں کہا تھا بانی پی ٹی آئی سے ملاقات کرادیں، حکومتی کمیٹی نے بانی پی ٹی آئی سے ملاقات کرانے کی یقین دہانی کرائی۔
چیئرمین سنی اتحاد کونسل نے کہا کہ تیسری میٹنگ تک ملاقات نہیں کرائی گئی، حکومتی کمیٹی سمجھ رہی تھی مطالبات میں بانی پی ٹی آئی کی رہائی کا لکھا ہوگا۔صاحبزادہ حامد رضا نے کہا کہ ہم نے تو تحریری مطالبات میں بانی پی ٹی آئی کی رہائی کا نہیں لکھا، یہ لوگ تاثر بنانا چاہتے تھے تحریری مطالبات لہرائیں گے کہ این آر او مانگ لیا، تیسری میٹنگ کے بعد رانا ثنااللہ اور عرفان صدیقی کی پریس کانفرنس دیکھ لیں۔حیرت کی بات ہے کہ 9مئی کے مقدمات میں ایک شخص 3 جگہ پر موجود ہے، شاہ محمود قریشی کراچی میں تھے اور مقدمات میں کہا گیا راولپنڈی میں تھے،حکومت مذاکرات کے ذریعے جو تاثر بنانا چاہتی تھی وہ موقع ہم نےنہیں دیا۔
حامد رضا کا کہنا تھا کہ بانی پی ٹی آئی کہتے ہیں کہ آزاد کمیشن کے ذریعے 9مئی کی تحقیقات ہونے دیں، بانی پی ٹی آئی کہتے ہیں ہمارے لوگ ملوث پائے گئے تو ان کی مذمت کرینگے۔9مئی کو جو لوگوں کو اکسا رہے تھے ان کی نشاندہی تو کرلیں، ہر میٹنگ میں کیوں کمٹمنٹ کرتے ہیں کہ بانی سے ملاقات کرائیں گے۔حامد رضا نے کہا کہ احتجاج کا راستہ ہمارے پاس موجود ہے، ایوانوں میں احتجاج ریکارڈ کرا رہے ہیں، اسٹینڈنگ کمیٹی نے 40 منٹ میں اختلافی نوٹ لیے بغیر پیکا ایکٹ میں ترمیم منظور کی۔
