جمہوریہ ڈومینیکن کے دارالحکومت سانتو ڈومنگو میں ایک نائٹ کلب کی چھت گرنے سے 98 افراد ہلاک اور 150 سے زائد زخمی ہو گئے ہیں۔ یہ حادثہ معروف گلوکار ربی پیریز کے کنسرٹ کے دوران پیش آیا۔ حکام کے مطابق، ہلاک ہونے والوں میں مونٹی کرسٹی صوبے کی گورنر نیلسی کروز اور سابق میجر لیگ بیس بال کھلاڑی اوکٹاویو ڈوٹیل بھی شامل ہیں۔ حادثے کے وقت نائٹ کلب میں سینکڑوں افراد موجود تھے، اور کئی افراد ملبے تلے دب گئے ہیں، جن کی تلاش کے لیے ریسکیو آپریشن جاری ہے۔ حکام نے ہلاکتوں میں اضافے کا خدشہ ظاہر کیا ہے، لیکن ایمرجنسی آپریشنز سینٹر کے ڈائریکٹر نے امید ظاہر کی ہے کہ ملبے کے نیچے کچھ افراد زندہ بھی ہو سکتے ہیں۔
جمہوریہ ڈومینیکن کے صدر نے اس افسوسناک واقعے پر متاثرہ خاندانوں سے گہرے دکھ اور ہمدردی کا اظہار کیا ہے۔
