دبئی(سپورٹس رپورٹر)دنیا کرکٹ کے پانچ سابق نامورکھلاڑیوں شاہد آفریدی ، یوراج سنگھ، شیکھر دھون، کرس گیل اور اے بی ڈی ویلیئرز نے ورلڈ چیمپیئن شپ آف لیجنڈز (ڈبلیو سی ایل)کے سیزن 2 میں شرکت کی تصدیق کردی ہے۔
ورلڈ چیمپیئن شپ آف لیجنڈز (ڈبلیو سی ایل)اپنی کیٹگری میں انگلینڈ کرکٹ بورڈ سے منظور شدہ واحد کرکٹ لیگ ہے جس نے اپنے مداحوں کے لئے لائیو و دی لیجنڈز (ایل ڈبلیو ایل)کیلئے رجسٹریشن شروع کردی ہے۔ اس اقدام سے دنیا بھر میں کرکٹ کے شائقین کو 16 روزہ برطانیہ کے خصوصی دورے کا موقع ملے گا جہاں 12 منتخب شائقین کرکٹ کے عظیم ترین ستاروں کے ساتھ رہائش گاہوں اور تجربات کا اشتراک کریں گے۔
لائیو ود دی لیجنڈز پروگرام کھیل کی بڑوں تک رسائی کا ایک غیرمعمولی پروگرام ہے جس میں کرکٹ لیجنڈز کے ساتھ خصوصی سفر اور رہائش کے انتظامات ، ٹیم کی تیاریوں اور میچ ڈے کی سرگرمیوں تک پس پردہ رسائی ، سرکاری ڈبلیو سی ایل ایونٹس اور میچ کے بعد کی تقریبات تک وی آئی پی رسائی ، کھلاڑیوں کے ساتھ ون آن ون بات چیت ، پیشہ ورانہ فوٹو سیشن اور ٹیموں کی دستخط شدہ یادداشتیں شامل ہیں،انتخاب کا عمل احتیاط سے ڈیزائن کردہ تین مراحل میں مکمل ہوگا۔
پہلا رائونڈ 15 فروری سے 15 مارچ تک جاری رہے گا،کامیاب امیدوار 16 مارچ سے 25 اپریل تک منعقدہ دوسرے مرحلے میں جائیں گے، جہاں انہیں کرکٹ کے لئے اپنے جذبے کے اظہار کے لئے ایک منٹ کی ویڈیو پیش کرنا ہوگی۔
فائنل رائونڈ 7 سے 9 اپریل تک جاری رہے گا جس میں ڈبلیو سی ایل کے کپتانوں اور آفیشلز کے ساتھ براہ راست زوم انٹرویوز ہوں گے جس کے فاتحین کا اعلان 15 اپریل کو کیا جائے گا۔رجسٹریشن ڈبلیو سی ایل کی آفیشل ویب سائٹ پر 7 فروری سے 15 مارچ تک کھلی ہے۔
