صدر مملکت کے معالج ڈاکٹر عاصم حسین نے سوشل میڈیا اور بھارتی چینلز پر صدر کی صحت سے متعلق چلنے والی جھوٹی خبروں کی سخت تردید کی ہے۔
کراچی میں میڈیا سے گفتگو کرتے ہوئے ڈاکٹر عاصم نے بتایا کہ صدر مملکت کا کورونا ٹیسٹ مثبت آیا تھا، تاہم ان کی طبیعت بتدریج بہتر ہو رہی ہے۔ انہوں نے کہا کہ یہ کہنا کہ صدر کو کورونا نہیں ہوا، بالکل غلط ہے۔
انہوں نے مزید کہا کہ صدر آصف علی زرداری سے ملاقاتوں پر پابندی برقرار ہے، مگر ان کی حالت اب ویسی سنگین نہیں رہی۔ ڈاکٹر عاصم نے بتایا کہ صدر کے اہل خانہ کو ان کی صحت کے بارے میں مکمل آگاہی دی جا رہی ہے، اور پیپلز پارٹی کا اپنا فیصلہ ہے کہ وہ کوئی فوٹیج جاری کریں یا نہیں۔
واضح رہے کہ صدر پاکستان آصف علی زرداری کورونا وائرس کا شکار ہونے کی وجہ سے کراچی کے نجی ہسپتال میں زیر علاج ہیں۔ گزشتہ روز وزیراعظم پاکستان شہباز شریف نے فون پر صدر کی خیریت دریافت کی اور ان کی صحت کے بارے میں نیک خواہشات کا اظہار کیا۔
