سنکیانگ، چین: شمال مغربی چین کے معروف سیاحتی مقام "شیاتا ویلی” میں ایک معلق پل اچانک ٹوٹ کر گر گیا، جس کے نتیجے میں 5 افراد جاں بحق اور 24 شدید زخمی ہو گئے۔ یہ واقعہ اس وقت پیش آیا جب متعدد سیاح پل پر موجود تھے اور اچانک اس کا ایک کیبل ٹوٹنے سے پورا ڈھانچہ ایک جانب جھک گیا۔
حادثے کی ویڈیوز سوشل میڈیا پر وائرل ہو گئیں جن میں دیکھا جا سکتا ہے کہ پل کا ایک سرا مکمل طور پر دریا کی طرف گر چکا ہے، جبکہ حفاظتی جنگلے نیچے لٹک رہے ہیں۔ فوری طور پر ریسکیو ٹیمیں موقع پر پہنچیں اور امدادی کارروائیاں شروع کیں۔
چینی سرکاری میڈیا کے مطابق، پل گرنے کے بعد "شیاتا” کے سیاحتی مرکز کو عارضی طور پر بند کر دیا گیا ہے اور واقعے کی مکمل تحقیقات کا آغاز کر دیا گیا ہے۔ ابتدائی اطلاعات کے مطابق پل کی مرمت یا معائنے کے دوران کوئی حفاظتی اقدامات نہیں کیے گئے تھے، جس پر حکام نے سنجیدہ نوٹس لیا ہے۔
چین کی مرکزی حکومت نے حادثے میں زخمی ہونے والوں کو طبی سہولیات فراہم کرنے اور پل کی حالت کا تجزیہ کرنے کے لیے ایک اعلیٰ سطحی تحقیقاتی ٹیم روانہ کر دی ہے۔
"شیاتا” کا علاقہ اپنے قدرتی مناظر، بلند و بالا پہاڑوں، نیلگوں دریا اور قدیم آثارِ قدیمہ کی وجہ سے سیاحوں میں بے حد مقبول ہے، تاہم یہ واقعہ انتظامی غفلت اور سیاحتی سلامتی پر ایک سنگین سوالیہ نشان بن گیا ہے۔
