بیجنگ (نیوز رپورٹر) چینی صدر شی جن پھنگ نے بیجنگ کے عظیم عوامی ہال میں چین کے سرکاری دورے پر آئے ہوئے برازیل کے صدرلولا ڈی سلوا سے ملاقات کی ۔منگل کے روز چینی میڈ یا کے مطا بق شی جن پھنگ نے کہا کہ چین اور برازیل اسٹریٹجک باہمی اعتماد پر قائم رہتے ہوئے مرکزی مفادات اور اہم خدشات سے متعلق امور پر ایک دوسرے کی حمایت کریں گے اور ہر سطح پر ہمہ جہت تبادلوں کو مضبوط بناتے ہوئے دوطرفہ تعلقات کی طویل مدتی، صحت مند اور مستحکم ترقی کو یقینی بنائیں گے۔
انہوں نے کہا کہ ہمیں دونوں ممالک کے درمیان تعاون کے مختلف میکانزم کو مکمل طورپر بروئے کار لاتے ہوئے عملی تعاون میں مزید روشن امکانات پیدا کرنے کی کوشش کرنا ہوگی۔شی جن پھنگ کا کنہا تھا کہ ہم اگلے سال "چین برازیل ثقافتی سال” منائے جانے کے موقع سے فائدہ اٹھا کر ثقافت، تعلیم، سیاحت، میڈیا اور مقامی شعبوں میں تعاون کو مضبوط بنائیں گےا ور کثیر الجہت تعاون پر عمل پیرا رہیں گے۔ان کا کہنا تھا کہ چین اور برازیل اقوام متحدہ، برکس اور چین اور سی ای ایل اے سی فورم سمیت دیگر کثیر الجہتی میکانزم میں ہم آہنگی اور تعاون کو مضبوط بناتے ہوئے ثابت قدمی کےساتھ یکطرفہ پسندی ، تحفظ پسندی اور غنڈہ گردی کی مخالفت کریں گے۔
برازیل کے صدر لولا ڈی سلوا نے کہا کہ برازیل اور چین کے درمیان تعلقات مضبوط ہیں اور ان میں کسی بھی بیرونی مداخلت کی اجازت نہیں دی جائےگی۔ان کا کہنا تھا کہ دوسرے بڑے ممالک کے برعکس، چین نے ہمیشہ برازیل سمیت لاطینی امریکی ممالک کی معاشی اور سماجی ترقی کے حصول میں مخلصانہ حمایت اور مدد کی ہے.انہوں نے کہا کہ ان کا ملک ، برازیل چین ہم نصیب معاشرے کی تعمیر کو فروغ دینے، اپنی ترقیاتی حکمت عملی کو بیلٹ اینڈ روڈ انیشی ایٹو کے ساتھ ہم آہنگ کرنے اور تمام شعبوں میں تعاون کو گہرا کرنے کے لئے چین کے ساتھ مل کر کام کرنے کے لئے تیار ہے۔ڈی سلوا کا کہنا تھا کہ تحفظ پسندی اور بےجا محصولات ترقی اور خوشحالی نہیں لائیں گے بلکہ صرف افراتفری کا باعث بنیں گے ۔ا ن کا کہنا تھا کہ عالمی چیلنجز سے نمٹنے میں چین کے پختہ عزم نے تمام ممالک کو طاقت اور اعتماد فراہم کیا ہے۔
بات چیت کے بعد دونوں سربراہان مملکت نے ترقیاتی حکمت عملی، سائنس و ٹیکنالوجی، زراعت، ڈیجیٹل معیشت، فنانس، انسپکشن اور قرنطینہ اور میڈیا کے شعبوں میں تعاون کی 20 دستاویزات پر دستخط کا مشاہدہ کیا۔ فریقین نے کثیر الجہتی کے مشترکہ تحفظ سے متعلق مشترکہ بیان اور یوکرین کے بحران پر بھی مشترکہ بیان جاری کیا۔
بات چیت سے قبل شی جن پھنگ اور ان کی اہلیہ پھنگ لی یوان نے برازیل کے صدر اور ان کی اہلیہ کے استقبال کے لئے شاندار تقریب کا اہتمام کیا۔ اسی رات شی جن پھنگ اور پھنگ لی یوان نے لولا ڈی سلوا اور ان کی اہلیہ کے لیے استقبالیہ ضیافت کا بھی اہتمام کیا
