واشنگٹن:
امریکا اور چین کے درمیان جاری تجارتی کشیدگی کے دوران ایک دلچسپ تنازع سامنے آیا ہے جس نے سوشل میڈیا پر ہلچل مچا دی ہے۔
وائٹ ہاؤس کی پریس سیکرٹری کیرولین لیوٹ پر چینی سفارتکار ژانگ ژیشینگ نے الزام لگایا ہے کہ وہ جس لباس میں چین کے خلاف بیانات دے رہی ہیں، وہ خود چین میں تیار کیا گیا ہے۔
ژانگ نے سابقہ ٹوئٹر (ایکس) پر کیرولین کی تصویر شیئر کرتے ہوئے لکھا:
"چین پر الزامات کاروبار، اور چین سے خریداری زندگی!”
ساتھ ہی انہوں نے اس جیسا ایک چینی ڈیزائن بھی پوسٹ کیا جو مقامی ویب سائٹس پر فروخت کے لیے دستیاب ہے۔
ژانگ کے مطابق، لباس کی لیس چین کے شہر ما بو میں تیار کی گئی تھی، جسے ایک مقامی ملازم نے پہچانا۔
سوشل میڈیا پر تبصروں کی بھرمار شروع ہو گئی، کسی نے کیرولین پر منافقت کا الزام لگایا، تو کسی نے لباس کو نقل قرار دیا۔ ایک صارف نے لکھا:
"زبان سے چین پر وار، جسم پر چینی لباس کا اظہار!”
دوسری جانب، کچھ صارفین نے دعویٰ کیا کہ یہ فرانسیسی ڈیزائن کی نقل ہے، اور اسے چین سے جوڑنا "فیک نیوز” ہو سکتا ہے۔
کیرولین لیوٹ حالیہ دنوں میں چین کے خلاف سخت بیانات کے سبب خبروں میں رہیں، لیکن اس "لباس تنازع” نے ایک نیا باب کھول دیا ہے۔ اب دیکھنا یہ ہے کہ وائٹ ہاؤس اس پر کیا وضاحت دیتا ہے، یا یہ معاملہ وقت کے ساتھ دب جائے گا۔
