اسلام آباد(کورٹ رپورٹر)سپریم کورٹ نے چیئرمین پی ٹی آئی کی سابقہ قومی اسمبلی کے حلقہ این اے131لاہور میں دوبارہ گنتی کے خلاف درخواست نمٹا دی۔
تفصیلات کے مطابق بدھ کوچیف جسٹس پاکستان کی سربراہی میں دو رکنی بینچ نے حلقہ این اے131لاہور میں دوبارہ گنتی کے خلاف درخواست پر سماعت ہوئی۔چیف جسٹس عمر عطا بندیال نے چیئرمین پی ٹی آئی کے وکیل بابر اعوان سے مکالمہ کرتے ہوئے کہاکہ دوبارہ گنتی کی اپیل تو اب غیر موثر ہو چکی جس پر بابر اعوان نے جواب دیاکہ جی سر بلکل غیر موثر ہو چکی ہے۔
بابر اعوان نے کہاکہ اجازت دیں تو اس معاملے پر چیئرمین پی ٹی آئی سے نئی ہدایات لے لوںجس پر چیف جسٹس نے ریمارکس دئیے کہ قومی اسمبلی تحلیل ہو چکی ہے،اسمبلی تحلیل ہونے کے بعد اس معاملے پر مزید کیا ہو سکتا ہے،اب نئے انتخابات کا انتظار کرنا چاہیے۔چیئرمین پی ٹی آئی کے وکیل نے کہاکہ نئے انتخابات کا تو ہمیں بھی بے صبری سے انتظار ہے۔سپریم کورٹ نے درخواست عمران خان کی درخواست غیر موثر ہونے پر نمٹا دی۔
یاد رہے کہ چیئرمین پی ٹی آئی نے این اے131لاہور میں دوبارہ گنتی کے خلاف اپیل دائر کر رکھی تھی جس پر لاہور ہائیکورٹ نے سعد رفیق کی درخواست پر این اے 131میں دوبارہ گنتی کا حکم دیا تھا۔چیئرمین پی ٹی آئی نے لاہور ہائیکورٹ کا فیصلہ چیلنج کر رکھا تھا۔
