کراچی(نیوز رپورٹر)پاکستان تحریک انصاف سندھ کے صدر حلیم عادل شیخ نے عادل ہائوس پر میڈیا سے گفتگو کرتے ہوئے کہا ہے کہ پیپلزپارٹی سندھ کے عوام کو دریائے سندھ کے پانی پر قبضے کے معاملے پر گمراہ کر رہی ہے۔
پیپلزپارٹی کے قائدین نے سندھ کے پانی کا سودا کر لیا ہے اور عوام کے رد عمل سے بچنے کے لیے جھوٹے بیانات دے رہے ہیں۔ ایک طرف آصف علی زرداری نئے کئنال بنانے کی منظور دے رہے ہیں تو دوسری طرف سندھ میں کئنالوں کی تعمیر کے مخالف بیان دیکر عوام کو گمراہ کیا جارہا ہے۔ پیپلزپارٹی کی دہری پالیسی سے عوام باخوبی واقف ہوچکی ہے۔حلیم عادل شیخ نے کہا کہ اس وقت دریائے سندھ میں 50 فیصد تک پانی کی کمی کا سامنا ہے، اگر چھ نئی نہریں بن گئیں تو سندھ کی زمینیں بنجر ہو جائیں گی۔
سندھ پہلے ہی پانی کے شدید بحران کا شکار ہے اور مزید کٹوتیاں تباہی کا سبب بنیں گی۔انہوں نے مزید کہا کہ بانی چیئرمین پی ٹی آئی عمران خان نے خصوصی پیغام دیا ہے کہ وہ سندھ کے عوام کے ساتھ کھڑے ہیں اور کسی صورت سندھ کے پانی پر ڈاکا ڈالنے نہیں دیں گے۔ سندھ کے عوام کا پانی ان کا حق ہے اور اسے چھیننے نہیں دیا جائے گا۔پیپلزپارٹی کی ناقص حکمرانی پر تنقید کرتے ہوئے حلیم عادل شیخ نے کہا کہ گزشتہ 17 سالوں میں پیپلزپارٹی نے سندھ کو کھنڈر میں تبدیل کر دیا ہے۔
عوام کو بنیادی سہولیات تک میسر نہیں، تعلیم، صحت اور انفراسٹرکچر کا نظام مکمل طور پر تباہ ہو چکا ہے۔انہوں نے کہا کہ سندھ میں ڈاکو راج ہے اور امن و امان کی صورتحال انتہائی خراب ہو چکی ہے۔ کراچی میں اسٹریٹ کرائم میں خطرناک حد تک اضافہ ہوا ہے جبکہ شہری بجلی، گیس اور پانی کے لیے ترس رہے ہیں۔حلیم عادل شیخ نے کہا کہ نااہل حکمرانوں کی وجہ سے عوام کا استحصال کیا جا رہا ہے اور سندھ کے وسائل پر چند کرپٹ عناصر قابض ہیں۔ بہت جلد سندھ کے عوام کو ان کرپٹ حکمرانوں سے نجات دلوائیں گے سندھ میں بھی انصاف کی حکمرانی قائم کریں گے۔
