وزیراعظم شہباز شریف نے کہا ہے کہ بجلی قیمتوں میں مزید کمی کے لیے کوششیں جاری ہیں، اور عالمی منڈی میں پیٹرولیم قیمتوں میں کمی ہونے پر ایک بار پھر پیٹرول کے بجائے بجلی سستی کریں گے۔
اسلام آباد میں اعلیٰ سطح اجلاس سے خطاب کرتے ہوئے انہوں نے کہا کہ بجلی کی فی یونٹ قیمت میں کمی سے قوم کو ہر شعبے میں فائدہ پہنچے گا، اور مزید کمی کے لیے کوشش کی جارہی ہے۔ امید ہے کہ چند ماہ میں مزید بہتر نتائج سامنے آئیں گے۔
انہوں نے کہا کہ عالمی منڈی میں تیل کی قیمتوں میں حال ہی میں کمی واقع ہوئی ہے، اور اس کا دیرپا فائدہ حاصل کرنے کی کوشش کی جارہی ہے۔ تجاویز پر غور کیا جا رہا ہے اور جلد ایک آپشن بنا کر لایا جائے گا۔
وزیراعظم نے کہا کہ چند ہفتے پہلے تیل کی قیمتوں میں کمی واقع ہوئی تھی، لیکن ہم نے پیٹرول کی قیمت کم نہیں کی، بلکہ اسے پی ڈی ایل میں شامل کیا۔ تاہم، عوام کو فائدہ پہنچانے کے لیے ہم نے بجلی کے نرخ کم کر دیے۔
وزیراعظم نے مزید کہا کہ عالمی سطح پر پیٹرول کی جو مزید قیمتیں کم ہو رہی ہیں، ان کے لیے ہم سنجیدگی سے کام کریں گے تاکہ اس کا فائدہ آخرکار ہماری معیشت اور عوام کو پہنچے۔
انہوں نے یہ بھی کہا کہ میری ٹائم سیکٹر کی بہتری کے لیے ٹاسک فورس قائم کی گئی تھی، جس نے سخت محنت کے ساتھ اصلاحات کیں اور اس کے مثبت نتائج سامنے آ رہے ہیں۔
